«Самұрық-Қазына» қорының таза пайдасы 10%-ға азайып, 2,12 трлн теңгені құрады
«Самұрық-Қазына» қорының шоғырландырылған таза пайдасы 2023 жылдың қорытындысы бойынша 10,3%-ға азайып, 2,12 трлн теңгені құрады. Бұл туралы компанияның Қазақстан қор биржасына (KASE) ұсынған шоғырландырылған есебінде жазылған.
Көрсеткіш негізінен шығындардың 4,5 есе артуы және басқа операциялық шығыстардың ұлғаюы есебінен төмендеді. Қаржылық шығындар да өсті (710 млрд теңгеге дейін) және бірлескен және шоғырландырылған компаниялардың таза пайдасы 1,5 есеге (945 млрд теңгеге дейін) азайды.
Бұл ретте жалпы пайда мен операциялық қызметтен түскен пайда аз ғана өсті. Кірісі 15,4 трлн теңгеге жетті. Бұл 2022 жылдың қорытындысымен салыстырғанда 4,1%-ға артық. Мемлекеттік субсидиялар көлемі 14,3%-ға өсіп, 61 млрд теңгеге жетті.
Активтер 9,8%-ға ұлғайып, 36,92 трлн теңгеге жетті, бұл негізінен басқа ұзақмерзімді активтердің 2,5 есеге ұлғаюы, сондай-ақ берілген несиелер мен қаржылық лизингке таза инвестициялардың (айналымдағы активтер) екі есе артуы есебінен болды.
Жеке капитал 10,1%-ға өсіп, 21,73 трлн теңгеге жетті. Көрсеткіш бақыланбайтын үлестің екі есе ұлғаюы (4,6 трлн теңгеге дейін) және бөлінбеген пайданың 10,34 млрд теңгеге дейін ұлғаюы есебінен өсті.
Міндеттемелер 9,8%-ға өсіп, 15,18 трлн теңгеге жетті. Үкіметтен алынған несие көлемі үш есеге өсіп, 11 млрд теңге болды. Басқа ағымдағы міндеттемелер 1,15 трлн теңгеге жетті, бұл 2022 жылмен салыстырғанда үш есеге жуық артық. Сатуға арналған активтер бойынша міндеттемелер 50,5%-ға өсіп, 1,57 трлн теңгеге жетті.
Еске сала кетсек, «Самұрық-Қазына» әл-ауқат қоры 2023 жылы 1,8 трлн теңге таза пайда табуы мүмкін деп хабарлады.
Бұл 2022 жылмен салыстырғанда 5,1%-ға аз. Алайда қордың экономика және қаржы жөніндегі тең басқарушы директоры Мират Өтепов бұл өте жақсы көрсеткіш деп атап өтті.
«Самұрық-Қазынаның» жалғыз акционері – Қазақстан үкіметі. «Самұрық-Қазына» Ұлттық әл-ауқат қоры» АҚ 2008 жылы құрылды. Қор елдің ең ірі стратегиялық компанияларын басқарады, соның ішінде Air Astana, «Қазақтелеком», «Қазатомөнеркәсіп», «ҚазМұнайГаз», «Қазпошта», «Қазақстан темір жолы», KEGOC және т.б бар.
