Роман Скляр Ұлттық инвестициялық орталықты басқарады
Премьер-министрдің бірінші орынбасары Роман Скляр өз қызметіне қоса Ұлттық инвестициялық орталықты басқаратын болады. Орталықтың міндеттерінің бірі-инвестициялар тарту жөніндегі кеңес хатшылығының қызметін ұйымдастыру. Бұл туралы премьер-министрдің қаулысында жазылған.
«Инвестициялық қызмет жөніндегі Ұлттық Орталық құрылсын. Ұлттық орталық өз қызметін Үкімет аппаратының индустриялық және инфрақұрылымдық даму бөлімінің құрылымы негізінде жүзеге асырады», – деп жазылған құжатта.
Орталықтың міндеттері:
- инвестициялар тарту жөніндегі кеңес хатшылығының қызметін ұйымдастыру;
- бәсекеге қабілетті инвестициялық ахуалды құру үшін реттеуші саясатты жетілдіру жөнінде ұсыныстар әзірлеу;
- инвестициялық жобаларды сүйемелдеу және іске асыру мониторингі;
- мемлекеттік қызметтер көрсету жөніндегі инвестициялық жобаларды сүйемелдеу және іске асыру мониторингі кезінде сала аралық үйлестіру;
- инвесторларға мемлекеттік қызметтерді жүзеге асыратын мемлекеттік органдардың бизнес-процестерін жетілдіру жөнінде ұсыныстар әзірлеу.
Құжатта орталық қызметін басқару функциясы премьер-министрдің бірінші орынбасары Роман Склярға берілетіні жазылған.
Қазақстан инвестициялық тартымдылығы жоғары ТОП-10 мемлекеттің қатарына қосылған. Осылайша Азия, Африка, Таяу Шығыс және Еуропа елдерінің инвестициялық тартымдылығына жүргізілген зерттеу рейтингінде алтыншы орынға орналасқан.
