Қазақстандық мәнерлеп сырғанаушы Денис Тенді өлтіргені үшін сотталған екі азаматтың жаза режимі жеңілдетілген. 2023 жылдың күзінде Нұралы Қиясов пен Арман Құдайбергенов қатаң режим колониясынан қауіпсіздігі орташа мекемеге ауыстырылған. Ақпаратты «Курсивке» Алматы облыстық соты растады.
Сот шешіміне алғашқы болып Tengrinews мән берген. 2023 жылдың қазан айында Қонаев қалалық соты Нұралы Қиясов пен Арман Құдайбергеновті қатаң режимдегі колониядан қауіпсіздігі орташа мекемеге ауыстыру туралы шешім қабылдаған.
Алматы облысындағы №12 колонияның басшысы режимді жеңілдету туралы ұсынысты 2023 жылдың наурызында сотқа жолдаған. Ол өз ұсынысын заңмен ынталандырған. Яғни заңға сәйкес, бұрын бас бостандығынан айырылмаған қасақана қылмыс жасағаны үшін екі жылдан астам мерзімге сотталғандар жазасын орташа қауіпсіздік колонияларында өтеуі керек.
Колония басшысы тергеу изоляторында 7 ай және 29 күн болу мерзімін бір күнге жарты күн деп есептеуді ұсынған. Яғни тағы төрт ай мерзім қосу.
Қонаев соты ұсынысты қанағаттандырған.
«Олардың бұрын бас бостандығынан айыру түріндегі жазасының болмауы және қасақана қылмыс жасағаны үшін екі жылдан астам мерзімге бас бостандығынан айыруға сотталуы негізінде олардың жағдайын жақсартатын заңнаманың өзгеруіне сәйкес азаматтарға орташа қауіпсіздік қылмыстық-атқару жүйесінің мекемелерінде жазасын өтеу тағайындалды», — делінген Алматы облысы сотының «Курсивке» берген жауабында.
Осылайша Қиясов пен Құдайбергенов мерзімдерін Жамбыл және Шығыс Қазақстан облыстарында орналасқан орташа қауіпсіздік колонияларында өтеп жатыр. Қылмыстық-атқару жүйесі комитетінің мәліметі бойынша, жазасын өтеушілер бұл мекемелерде жұмыс орындарының болмауына байланысты жұмыс істемейді.
«Сотталған азаматтарға қылмыстық-атқару кодексіне сәйкес оларға жылына екі ұзақ және алты қысқамерзімді кездесу белгіленген», — деп хабарлады комитет.
2018 жылдың 19 шілдесінде Алматыда екі адам Lexus GX 460 көлігінің айнасын шығарып алуға тырысқан. Оларға көліктің иесі, белгілі қазақстандық мәнерлеп сырғанаушы Денис Тен кедергі келтірген. Олардың арасында жанжал туып, спортшы пышақ жарақатымен ауруханаға жеткізілген. 25 жастағы Тен ауруханада қайтыс болды.
2019 жылы 19 қаңтарда Алматы соты Нұралы Қиясов пен Арман Құдайбергеновті адам өлтіру және ұрлық жасау бойынша кінәлі деп тауып, екеуін де 18 жылға бас бостандығынан айырды. Олардың сыбайласы Жанар Толыбаева орташа қауіпсіздік мекемесінде 4 жылға бас бостандығынан айырылды. Бірақ бір жылдан кейін, яғни 2019 жылдың желтоқсанында ол қамаудан босатылды. Сот жазаның өтелмеген бөлігін денсаулығына және баласының болуына байланысты бас бостандығын шектеуге ауыстырды. Кейінірек ол колонияға оралып, 2021 жылдың желтоқсанында босатылды.
Денис Тен бес дүркін Қазақстан чемпионы, Азия чемпионы, Сочиде өткен қысқы Олимпиада ойындарының қола жүлдегері, Әлем чемпионатының күміс және қола жүлдегері.
