Бөлшектерді жеткізуші француздық Forvia компаниясы қытайлық BYD кәсіпорнының Еуропада жаңа жобасын жүзеге асыруына көмектеседі
Дүние жүзі бойынша жетінші орындағы автокөлік бөлшектерін жеткізуші француздық Forvia Венгрияда жаңа зауыт құрылысын қолға алған қытайлық BYD электр көлігі өндірушісімен ынтымақтасады. Бұл компания үшін Еуропадағы бірінші жоба болмақ, деп жазады Reuters.
Forvia бұл ынтымақтастық BYD-мен Азиядағы серіктестігінің кеңеюіне сеп болатынын айтты.
«Біздің ынтымақтастығымыз Азияда айтарлықтай жетістіктерге қол жеткізді және бұл жоба еуропалық нарықта одан әрі инновациялар мен өсуді қамтамасыз ететініне сенімдіміз», – деді Forvia бас директоры Патрик Коллер мәлімдемесінде.
Жаһандық автокөлік сатылымының төмендеуінен зардап шеккен автокөлік бөлшектерін өндірушілер жағдайды пайдаланып, қытайлық компаниялармен ынтымақтастықты нығайтуға тырысуда. Бұл қытайлық автоөндірушілер қанатын кеңге жайып, Қытай нарығындағы бәсекелестерге төтеп беруге ұмтылған кезде орын алып отыр.
Өткен жылдың соңында өзін «сіз ешқашан естімеген» ең ірі автомобиль бренді ретінде көрсететін қытайлық BYD компаниясы электромобиль нарығында сату көшбасшысы болуға дайын екенін жариялады. Bloomberg бұл 2024 жылдың бірінші тоқсанында болады және электр көліктер нарығы үшін символдық бетбұрыс болады және Қытайдың жаһандық автомобиль өнеркәсібіндегі өсіп келе жатқан ықпалын одан әрі растайды деп сенді.
Венгрияда салынып жатқан зауыт BYD компаниясының Қытайдан тыс алтыншы зауыты болмақ. Сондай-ақ компанияның Түркия, Тайланд, Бразилия, Мексика және Өзбекстанда өндіріс орындары бар немесе салуда.
Америка Құрама Штаттары мен Еуропалық Одақ Қытайда жасалған электр көліктерін импорттауға қатысты саясатты қатаңдатуда. Вашингтон қазірдің өзінде баж салығын 25%-дан 100%-ға дейін арттырды. Еуроодақ билігі мұндай бастаманы кеңінен талқылап жатыр. Шілде айының ортасында одақтас елдердің үкіметтері баж салығын арттыру бойынша өзара келісімге келе алмай отырғаны белгілі болды.
