Адам құқықтары жөніндегі уәкіл Артур Ластаев түзеу мекемелерінде кәсіпкерлікті дамытуды ұсынды. Бұл туралы Қазақстан Республикасындағы Адам құқықтары жөніндегі уәкіл сайтында жазылған.
2024 жылғы 23 шілдеде Артур Ластаев ҚР ІІМ ҚАЖК №18 мекемесінде болды. Бұл – Шығыс Қазақстан облысының Шемонаиха ауданында орналасқан қауіпсіздігі барынша жоғары мекеме.
Ластаев колониядағы сотталғандардың жағдайымен танысып, мекеменің ең төменгі халықаралық стандарттарға сәйкестігін тексеріп, асхана, тұрғын үйлер, медициналық пункт, өндірістік нысандарды аралап шықты.
Колониядағы өндірістік қызметтің ұйымдастырылуы ерекше назарға алынды. Қазіргі таңда мекемеде ағаш, металл, және жиһаз жасаумен айналысатын жеті кәсіпорын жұмыс істеп тұр. Сонымен қатар екі жылыжай мен техникалық қызмет көрсету станциясы бар. Бұл өндіріс орындары 230 сотталған азаматты жұмыспен қамтып отыр.
Сонымен қатар уәкіл сотталғандардың жеке өтініштерін тыңдап, олардың шартты түрде мерзімінен бұрын босату және жазаны жеңілдету институтын жетілдіру бойынша сұрақтарына жауап берді. Бұл мәселелер сотталғандар арасында үлкен қызығушылық тудырып отыр, себебі қамауда ұстау мерзімін қысқарту және жазаның жеңілдетілуі олар үшін өте маңызды.
Еске сала кетейік, бұған дейін Артур Ластаев Өскемендегі 22 мекемеде болды. Жалпы жыл басынан бері уәкіл сотталғандардың құқықтары мен қамауда ұстау жағдайларының сақталуын бақылау мақсатында 7 түзеу мекемесін аралады.
