Париждегі 2024 жылғы Олимпиада ойындарында спорт жұлдыздарының ішінде кім қанша табыс табатынын Forbes басылымы есептеді.
Forbes мәліметіне сүйінсек, Олимпиададағы ең бай спортшылар тізімінде аты-аңызға айналған баскетболшы Леброн Джеймс көш бастап тұр.
1. Леброн Джеймс, баскетбол – 1,19 млрд доллар
39 жастағы ардагер Париждегі-2024 ойындарында Америка құрамасының ту ұстаушысы болып шығады. Ол ресми түрде Олимпиадаға қатысатын жалғыз миллиардер болып тұр. Nike-пен өмір бойғы келісімшарт оған 997,6 миллион доллар табыс әкелді. Сонымен қатар әйгілі баскетболшы «Ливерпуль» және «Милан» футбол клубтарындағы үлестерге ие.
2. Кевин Дюрант, баскетбол – 299,6 млн доллар.
35 жастағы «Феникс Санз» ойыншысы жыл сайын 41,8 миллион доллар жалақы алады. Бұл көрсеткіш бойынша ол НБА-ның ең көп жалақы алатын баскетболшыларының тізіміне кіреді. Сондай-ақ баскетболшының жарнама берушілермен тиімді келісімшарттары бар. Тек Nike-пен жасалған келісімшартан жылына қосымша 25,7 миллион доллар табады. Кевин Дюрант компаниямен өмір бойы келісімшартқа отырған тарихтағы үшінші ойыншы болды.
3. Рори Макилрой, гольф – 289,7 млн доллар.
Әлемдегі ең қымбат спорт түрінің өкілі Рори Макилрой 35 жасында бірнеше жылжымалы мүлікке ие. Соның ішінде Флоридада люкс үйі, инфинити бассейні, теннис корты және 6 автокөлік гаражы бар. Айтпақшы, оның 1,2 миллион долларға бағаланған сәнді машиналар коллекциясы бар. Ең қымбат көлігі – Ferrari F12 Berlinetta.
4. Новак Джокович, теннис – 230,2 млн доллар.
36 жастағы серб өзінің мансабында 171 миллион доллар табыс тапты. Бұл әлемдік рекорд. Теннисші Hublot, Head, Raiffeisen Bank және Lacoste сияқты ірі брендтермен жұмыс істеді, бұл оған қосымша табыс әкеледі. Новак Джоковичтің Монте-Карло, Белград, Майами, Нью-Йорк және Марбеллада жылжымайтын мүлкі бар.
5. Рафаэль Надаль, теннис – 222,8 млн доллар.
38 жастағы испандық теннистік мансабында 138 миллионнан астам жүлдені жеңіп алды. Теннисші Жерорта теңізі жағалауындағы екі мүлікке және суперяхтаға иелік етеді.
6. Стефен Карри, баскетбол – 179,6 млн доллар.
36 жастағы америкалық 2021 жылы Golden State Warriors-пен 214 миллион долларлық келісімшартын ұзартты және Chase, Nissan, Sony, Unilever және Infiniti сияқты брендтермен жұмыс істейді. Сондай-ақ Стефен Карри жылжымайтын мүлікке инвестиция салады.
7. Энди Мюррей, теннис – 167,4 млн доллар.
Теннистегі тағы бір миллионер 37 жастағы британдық өз мансабында 65 миллион доллар табыс тапты. Бұл теннис тарихындағы 4-ші нәтиже. Сондай-ақ Энди Мюррей Jaguar, Head, Standard Life және Rado-мен серіктес.
8. Наоми Осака, теннис – 49,9 млн доллар.
Біздің тізімдегі алғашқы әйел 26 жастағы жапондық теннисші 20 миллион доллардан астам ақша тапты. 2021 жылы ол KINLÒ деп аталатын тері күтімі брендін шығарды. Теннисші Nike, Panasonic, PlayStation, Airbnb және Nissan сияқты бірнеше компанияларды жарнамалаған.
9. Кори Гауфф, теннис – 21,3 млн доллар.
Жасына қарамастан, 20 жастағы америкалық қазірдің өзінде біршама байлыққа ие. Ол теннистен 13,8 миллион доллар тапты. Жарнамалық келісімшарттар New Balance, Head, Bose және UPS-пен жасалған. Алайда спорт жұлдызының әлі күнге өз жеке үйі жоқ. Танымал теннисші ата-анасымен бірге тұрады.
10. Симона Байлс, спорттық гимнастика – 15,9 млн доллар.
Әлемдегі ең ірі жарыстарда атақты гимнаст 37 медаль жеңіп алды: Олимпиада ойындарының 4 дүркін чемпионы, сондай-ақ Әлем чемпионаттарында 30 медаль еншіленген. 27 жастағы Симона Байлстың Athleta, Sk-II skincare products, Visa, United Airlines, SpiethAmerica gymnastics equipment, Uber Eats және MasterClass компанияларымен жарнамалық келісімшарттары бар.
Айта кетейік, бұл тізімдегі 10-орынға қазақстандық теннисші Елена Рыбакина жайғасуы мүмкін еді, WTA Халықаралық теннис ассоциациясының мәліметі бойынша оның соңғы жылда тапқан табысы 18,8 млн долларға бағаланып отыр. Алайда спортшы Париж-2024 жазғы Олимпиада ойындарына денсаулығына байланысты қатыса алмайтынын айтты.
