«ҚазМұнайГаздың» басшылық құрамына жаңа кадр келді
«ҚазМұнайГаз» ҰК АҚ басқарма төрағасының орынбасары болып Руслан Балықбаев тағайындалды. Руслан Әлібекұлы ірі жобаларды басқарады. Компания сайтында Балықбаев әзірге басқарма мүшесі ретінде көрсетілмеген.
Руслан Балықбаев Қазақстан-Британ техникалық университетін «Мұнай және газ кен орындарын игеру», Турин қаласының политехникалық университетін (Polytechnic University of Turin) мұнай инженері магистрі мамандығы бойынша бітірген.
2013-2024 жылдары Балықбаев «PSA» ЖШС-де менеджер, аға менеджер, департамент директоры, Солтүстік Каспий жобасы бойынша бас менеджер (Басқарма мүшесі) болып қызмет атқарды.
«Ерен еңбегі үшін» мемлекеттік наградасымен, «Мұнай-газ саласының еңбек сіңірген қызметкері» төсбелгісімен марапатталған. 2019 жылдан бері Президенттік жастар кадр резервінің мүшесі.
