Forbes тізіміндегі медиа менеджер Абылайхан Камаладин Rams Qazaqstan компаниясын сотқа бермек. Бұл туралы ол өзінің Instagram парақшасында жазды. Блогер «RAMS-тан зардап шеккендерге» жүгініп, компанияның жұмысына шағымдарын жіберуді өтінді. Сондай-ақ блогер Әмір Тәжібаевпен бірге осы жағдай туралы фильм түсіретінін мәлімдеді.
«Біздің Rams Qazaqstan компаниясымен келіссөздеріміз аяқталды. Өзара келісе алмадық. Ақшамды қайтару үшін компанияны ресми түрде сотқа беремін», – деп жазды Камаладин.
Оның айтуынша, Rams Qazaqstan құрылыс компанияларына қомақты қаржы қарыз.
«Қазір Rams Qazaqstan барлық пәтер мен коммерциялық үй-жайға үлкен жеңілдіктер мен сатылым жариялады. Үлкен жеңілдікпен. Оны алудың қажеті жоқ. Жеңілдіктер құрылыс сапасын жасыру үшін жасалған. Үйді сатып алу туралы шешіміңізге 100 рет өкінуіңіз мүмкін», — деп жазды Камаладин Instagram-да.
«Курсив» редакциясы Абылайхан Камаладинге мәселеге байланысты хабарласты. Блогер жақын арада жағдайды толыққанды баяндап беретінін айтты.
Абылайхан Камаладин – қазақстандық медиаменеджер және Qamalladin Media компаниясының негізін қалаушы. Компания Моңғолия, Әзірбайжан, Грузия, Армения нарықтарында блогермен жұмыс істейді. Forbes-2023 деректері бойынша компанияның жылдық айналымы – 900 млн теңге.
Rams Qazaqstan – жобалардың архитектурасымен, қасбеттері, интерьері, абаттандыруы және кешеннің инфрақұрылымымен айналысатын қазақстандық құрылыс компаниясы.
EGov мәліметтеріне сәйкес, компания құрылыста қолданылатын пластмасса бұйымдарын өндірумен айналысады. Құрылтайшылары – Рамазан Булбул және Алмат Баимбетов. Компания 1997 жылы 6 мамырда құрылған.
Блогерлерді дайындау, оларға жарнама тартумен айналысатын Qamalladin Media компаниясының негізін қалаушы Абылайхан және Диана Камалладиндер Kursiv Media KZ подкастында қонақ болған. Сұхбатта блогерлер мектебі, жарнама саласы мен креативті экономиканың дамуы және басқа тақырыптар сөз болды.
