Шілде айында жылдық инфляция – 8,6%, ал айлық инфляция 0,7%-ды құрады. Маусым айымен салыстырғанда, айлық инфляцияның сәл қарқын алғаны байқалады.
Маусымда Қазақстандағы жылдық инфляция 8,4%-ды құрағаны белгілі. Ал айлық инфляция 0,4 % деңгейінде қалыптасқан еді. Айлық инфляция көрсеткіші мамырда да осы деңгейде болды Алайда еліміздің 9 бірдей өңірінде инфляция республикалық деңгейден жоғары қалыптасқан.
Өткен айдағы инфляция көрсеткіші сарапшылар болжамынан асып түсті. Мамандар шілде айында инфляция 8,3 % деңгейінде қалыптасады деп болжам жасаған.
Бір айда ақылы қызмет бағасы 1,6% өссе, азық-түлікке жатпайтын тауарлар – 0,7%, азық-түлік тауарлары 0,2% қымбаттаған.
Ресми статистикаға сүйенсек, әсіресе, ұялы байланыс пен әуе билеттерінің, демалыс орындарының бағасы бір айда 10 %-дан аса өсті. Сұйытылған газ бағасы да көтеріліп, 5,3% қосты.
Азық-түліктен қырыққабат бағасы 16,8%, картоп – 7,5%, пияз – 7,3% қымбаттаған. Темекі өнімдері – 3,8%, минералды су 1,6% өсті. Бір айда қызанақ бағасы 18,2%, тәтті бұрыш – 11,2%, қызылша – 6,3%, қияр – 5,8%, сәбіз 2,1% арзандаған.
Өңірлердің ішінде ең жоғары айлық инфляция Астана қаласында – 1,3% (орташа республикалық деңгейден 0,6 п.т. жоғары), ең төмені Қостанай облысында – 0,2% тіркелген.
ЕАДБ сарапшыларының бағалауынша, 2024 жылдың соңында инфляция 8,3 %-ға төмендейді. Бұл алдыңғы болжамнан 1,2 %-дық тармаққа жоғары. Ал Халықаралық валюта қорының (ХВҚ) миссиясы жыл соңына қарай Қазақстанда инфляция 8% болады деп болжайды.
AERC сарапшылары Қазақстандағы инфляция күзге қарай 8,1%-ға дейін бәсеңдейді деп пікір білдірген.
