Қытай биржа статистикасын жасырып отыр

Goldman Sachs Group экономистері АҚШ-тың келесі жылға қатысты құлдырау ықтималдығын 25%-дан 20%-ға дейін төмендетті. Камала Харрис өзінің экономикалық жоспарын ұсынды. Қытайда шетелдік инвесторлар қаражатының қозғалысы туралы күнделікті мәліметтерді жариялауға тыйым салынды. Осы және өзге де тақырыптарды қамтыған кезекті шолуымызға зер салыңыз.

Goldman АҚШ-тағы рецессия қаупі сейілеріне сенімді

Goldman Sachs Group экономистері АҚШ-тың келесі жылға қатысты құлдырау ықтималдығын 25%-дан 20%-ға дейін төмендетті. Bloomberg сарапшылардың болжамды өзгертуіне өткен аптада жарияланған бөлшек сауда және жұмыссыздық жәрдемақысына берілетін өтінімдер туралы мәліметтер түрткі болған деп жазды. Аталған мәліметтер АҚШ экономикасының тұрақтылығын көрсетуде үлкен маңызға ие.

2023 жылдың басынан бері алғанда бөлшек сауда көлемі шілде айында айтарлықтай өсті. Ал жұмыссыздық жәрдемақысын алуға берілетін өтініштер азайып келеді. Goldman экономистері ФРЖ-ның қыркүйек айындағы отырыста пайыздық мөлшерлемелерді 25 базистік тармаққа төмендетеріне сенімді.

«Егер 6 қыркүйек күні жарияланатын тамыз айындағы жұмыспен қамту туралы есеп айтарлықтай жақсы қалыптасса, біз рецессия ықтималдығын 15%-ға дейін төмендетуіміз мүмкін», – деп атап өтті Ян Хациус бастаған Goldman экономистері клиенттерге арнаған жазбасында.

Дамушы нарық облигациялары биыл жақсы табыс әкелуі мүмкін

Bloomberg-тің жазуынша, ФРЖ-ның мөлшерлемені төмендетуі менеджерлерді портфельдерді әртараптандыруға және ақшаны АҚШ-тан дамушы нарық облигацияларына аударуға мәжбүр етеді. JPMorgan Asset Management, M&G Investments және Aviva Investors инвесторлары дамушы нарық облигацияларының қорын нығайту үшін айдың басында тәуекелді активтердің төмендеуін пайдаланды.

«Дамушы нарық облигациялары биыл қос цифрлы мәнде кіріс әкелуі мүмкін. 400 базистік тармақ – инвесторлар үшін тартымды фактор», – деді Лондондағы JPMorgan бөлімшесінің дамушы нарықтар бойынша қарыз бөлімінің басшысы Пьер-Ив Баро. Егер дамушы нарықтардағы корпоративтік облигациялардың ағымдағы өсу қарқыны жыл бойы сақталса, кірістілік 8%-дан асады. Бұл АҚШ-тың баламалы облигацияларының мөлшерлемесінен екі есе дерлік жоғары.

Дамушы нарықтардағы облигациялардың орташа кірістілігі жұма, 16 тамыз күні 7,4%-ды құрады. Бұл орташа бес жылдық көрсеткіштен шамамен 1 пайыздық тармаққа жоғары және 2021 жылдың қаңтар айынан бері екі есеге жуық өсіп отыр.

Дегенмен барлығы дерлік дамушы елдердің облигацияларына оптимистік көзқараспен қарайды.

«ФРЖ ставкаларды неліктен төмендететінін түсіну маңызды. Егер бұл АҚШ-тың рецессияға ұшырауына байланысты болса, онда ол көптеген тәуекелді активтерге, соның ішінде дамушы елдердің қарыздарына кері әсер етеді», – деді State Street Global Advisors компаниясының портфельдер бойынша аға менеджері және дамушы нарықтар бойынша қарыз бөлімінің басшысы Дженнифер Тейлор.

Алайда JPMorgan стратегтері базалық сценарий АҚШ-тағы рецессияны жоққа шығарады деп санайды. Олар елдегі экономикалық өсімнің баяулайтынын, ФРЖ ставкаларды қысқартатынын алға тартып отыр. Бұл инвесторларға дамушы нарықтардың жоғары кірісінен пайда табуға мүмкіндік береді.

Камала Харрис өзінің экономикалық жоспарын ұсынды

АҚШ президенттігіне үміткер Камала Харрис өткен жұмада алғаш рет АҚШ экономикасына қатысты жоспарын ұсынды. Америкалық БАҚ жоспарды өткен демалыс күндері егжей-тегжейлі талдауға тырысты.

«Президент ретінде мен орта тап үшін мүмкіндіктер жасауға назар аударамын», – деді Харрис. Ол өзінің басты мақсаты «тұрақты бизнес орта құру» болатынын атап өтті. Харрис нақты шаралар ретінде дәрі-дәрмектер мен медициналық қызметтер құнын шектеуді, бала өмірінің бірінші жылында балалар жәрдемақысының мөлшерін 6000 долларға дейін ұлғайтуды, бірінші рет үй сатып алушыларға жеңілдікпен несие беруді (бастапқы жарна үшін мемлекеттен 25 мың доллар) атап өтті, деп жазды Yahoo Finance.

Сонымен қатар Харрис Дональд Трамптың тарифтерді көтеру туралы жоспарын сынға алып, оларды «сатудан түскен ұлттық салық» деп атады. Алайда Харристің де жоспары сынның астында қалды. Онда мемлекеттік қарыз, салық саласы және өндіріс секторының мәселелері ескерілмеген.

Қытайда негізгі биржалық индикаторды жариялауға тыйым салынды

Қытайдың қор биржалары дүйсенбі, 19 тамыздан бастап шетелдік инвесторлар қаражатының қозғалысы туралы күнделікті мәліметтерді жариялауды тоқтатады, деп жазды Bloomberg. Мұндай қадам жаһандық қорлар бірнеше ай бойы қытайлық акцияларды жаппай сата бастағаннан кейін жасалып отыр. Осылайша, 2024 жылы Қытайда қаражаттың акциялардан алғашқы жылдық жылыстауын көруіміз мүмкін. Бірақ инвесторлар бұл туралы мәліметтерді биржалық деректерден біле алмайды.

Сарапшылар Қытай билігінің бұл қадамын нарықты қолдаудың тағы бір әрекеті, дәлірек айтсақ, инвесторлардың назарын аудару деп санайды. «Олар ақпаратты жасыру арқылы капиталдың кетуін тоқтата алады деп ойлайтын секілді. Бірақ бұл мәселені түп-тамырымен шеше алмайды», – деді Abrdn Asia LTD компаниясының инвестициялар жөніндегі директоры Синь-Яо Нг.

Мамыр айынан бастап CSI 300 индексі 9% жоғалтты. Өйткені ҚХР-да кірісті қалпына келтіру болжамы ақталмады әрі экономика мен қор нарығын мемлекеттік қолдау шаралары жеткіліксіз болып шықты. 2024 жылдың қорытындысы бойынша индекс төртінші жыл қатарынан шығынға ұшырауы мүмкін.

Бір қызығы, билік бұған дейін макроэкономикалық статистиканың бір бөлігін құпия еткен болатын.