Қытай экономикасының мардымсыз өсімі қарыз алуды арттыруды талап етеді, жыл ішінде алтын бағасы 20%-ға қымбаттауы мүмкін, АҚШ-тағы жетекші индикаторлар индексі шілдеде төмендеді, бірақ бұл рецессия басталды дегенді білдірмейді. Осы және өзге де тақырыптар туралы 19 тамыздағы шолуымыздан оқыңыз.
Алтын бағасы 2025 жылдың ортасына қарай 3 мың долларға дейін көтерілуі мүмкін
Алтын бағасы биыл біршама көтерілді. Сарапшылар әлі де өсім болады деп сендіріп отыр. Бұл туралы CNBC хабарлады. FactSet мәліметтері бойынша, алтын өткен сессияда бір унция үшін 2,508,14 долларға жетіп, рекордтық деңгейде сақталды. Ал АҚШ фьючерстері дүйсенбіде Азиядағы сауда-саттықта бір унция үшін 2,540 долларды құрап, 0,16% қосты. Сөйтіп жаңа рекордтық межені бағындырды.
«Алтын нарықтардағы белгісіздікке байланысты қымбаттап отыр», – деп есептейді BMI тауарларды талдау бөлімінің басшысы Сабрин Чоудхури. Citi сарапшылары геосаяси тәуекелдерді ескере отырып, 2025 жылдың ортасына қарай бағалы металдың бағасы унция үшін 3 мың доллар болады деген болжамды алға тартып отыр. Алтын бағасының өсуін ынталандыратын тағы бір фактор бар, ол – 2024 жылдың қыркүйегінде ФРЖ мөлшерлемесінің төмендеуіне деген сенімділікті арттыру.
«ФРЖ ставкаларды төмендете бастағаннан кейін, бәлкім, келесі айдың басында болар, алтын бір унция үшін 2 700 долларға жетуі мүмкін», – деп атап өтті Чоудхури. Ставкалар төмендеген жағдайда алтынмен бәсекелесетін қазынашылық облигациялар инвесторлар үшін онша қызық болмай қалады. Төмен пайыздық мөлшерлемелер долларға қысым жасайды. Бұл басқа валюталарға алтын құймаларын сатып алу мәмілелерінің тартымдылығын арттырады.
Қытай экономикасының мардымсыз өсімі қарыз алуды арттыруды талап етеді
Asia Financial жазғандай, Қытайға экономиканың 5%-дық өсімін қалпына келтіру үшін күрделі инвестициялар мен құрылымдық терең реформалар қажет. Қазір Қытайдың болашағына жылжымайтын мүліктің күрт құлдырауы, халықтың қартаюы, қарыз деңгейінің жоғарылығы және геосаяси шиеленіс көлеңке түсіріп отыр. «Қытай қарыз алуды, тіпті сауда ваучерлерін көбейту арқылы экономикалық өсуді жеделдетуге мәжбүр болады», – дейді экономистер.
«Қазіргі экономикалық көрсеткіштер алға қойылған мақсаттардан артта қалып отыр. Бұл жедел әрі маңызды саяси қадамдарды қажет етеді», – деді UBP Азия бойынша аға экономисі Карлос Казанова. Оның болжамынша, ҚХР Үкіметі бюджет тапшылығын жоспарланған 3%-дан ІЖӨ-нің 4%-ына дейін арттыру қажет.
Тағы бір спикер егер экономиканың өсімі баяулай беретін болса, қазан айында Бейжің облигациялар шығаруға қатысты 2025 жылға арналған жоспарын түзете алады деп хабарлады. Қытай 2023 жылдың қазан айында тапшылықты 3%-дан ІЖӨ-нің 3,8%-на дейін арттырып, жергілікті өзін-өзі басқару органдарына қарыз квоталарының бір бөлігін бөлек бөлген кезде осындай қадамдар жасады.
Дегенмен Қытайдың алдында таңдау бар: тартылған қаражатты қалай жұмсау керек. Кәдімгі инфрақұрылымдық шығындар схемасы аз табыс әкеледі, ал өндіріс секторына салынған инвестициялар артық қуат пен дефляцияға қатысты алаңдаушылықты күшейтеді.
«Қытай экономикасы, оның көлемін ескерсек, тек өндіріс пен экспорт бағытында ғана жұмыс істей алмайды. 5%-дық мақсатты өсімге жету үшін ішкі сұранысты қолдауды күшейту қажет. Ол үшін Үкімет тұтынушыларға қолма-қол ақшамен немесе ваучерлер арқылы кемінде 1 трлн юань (139 млрд доллар) қосымша тікелей қолдау көрсету жайын қарастыруы керек», – деп жазды Societe Generale сарапшылары.
Бұл сома Қытайдың 2023 жылғы ЖІӨ-нің 0,8%-на тең. Осыған ұқсас тәсілмен АҚШ-та да сұраныс қолдау тапқан болатын. Алайда ANZ-тің Қытайдағы аға стратегі Син Чжаопэн мұндай ваучерлердің әсері бір реттік екенін еске салды. Ал тұтыну жылжымайтын мүлік секторы мен акциялар нарығы қалпына келгеннен кейін ғана тұрақты өсу жолына түседі деп санайды.
J.P.Morgan: хедж-қорлар жапондық акцияларға қайта орала бастады
Хедж-қорлар жапондық акцияларға деген көзқарастарын өзгертті деп жазды Reuters. «Өткен аптаның соңында олар жапон қағаздарын сатып ала бастады», – деді J.P.Morgan сарапшылары клиенттерге арналған жазбасында. Нарықтағы қазіргі тенденциялардан белгілі бір алгоритмдерді қолданатын және тауар саудасына маманданған хедж-қорлар пайда көреді.
Сонымен CTA (call to action) 15 тамызда Nikkei 225 және TOPIX фьючерстерінде өз позицияларын қалпына келтірді. Ауысым брокерлер күткеннен де жылдам болды. J.P.Morgan сарапшылары Nikkei индексі тамыз айының басында құлағаннан кейін 35 мыңнан жоғары қалыптасса да, CTA қорлары өз позициясын аларына сенді. Бірақ ол 1987 жылдан бергі ең нашар бір күндік құлдырау тіркелген 5 тамыздағы ең төменгі деңгеймен салыстырғанда 20%-дан астам өсті. Дүйсенбі, 19 тамызда 38 300 ұпайдан асып түсті.
Сонымен қатар сарапшылар 5 тамызда жапондық акциялардың құлдырау себебін CTA жүйелік сауда стратегияларындағы қарыз қаражаттарының жаппай қысқаруымен байланыстырып отыр. Жапония Банкі ставкасының күтпеген жерден өсуі мұндай трейдерлердің «сабылуына» себеп болды. 9 тамызға дейін олар Nikkei фьючерстеріндегі ұзақ мерзімді позицияларының шамамен 50%-ын ысырып тастады, деп есептейді J.P.Morgan-дағы цифрлық және деривативті құралдардың жаһандық талдаушысы Масанари Такада.
Оның пікірінше, CTA әзірге «сынақтық» сатып алулар жасап жатыр. Егер жапондық акцияларды қалпына келтіру тұрақтанса, басқа қорлар да нарыққа оралады.
АҚШ-тың жетекші индикаторлар индексі шілдеде төмендеді, бірақ бұл рецессия туралы дабылды білдірмейді
Conference Board-тың жетекші экономикалық индексі шілдеде 0,6%-ға төмендеді. Мұндай құлдырау қатарынан бесінші ай бойы қалыптасып отыр, деп жазды MarketWatch. WSJ сауалнамасына қатысқан экономистердің болжамы 0,4%-ға тең.
Жетекші экономикалық индекс (LEI) ретінде белгілі жетекші индикаторлардың жиынтық индексі ай сайын Conference Board жариялайтын индикатор болып саналады. Ол алдағы айларда әлемдік экономиканың қозғалыс бағытын болжау үшін қолданылады. Индекс 10 экономикалық компоненттен тұрады. Олардың өзгерістері жалпы экономикадағы өзгерістерден бұрын болады. «LEI индексі ай сайын төмендей береді, бірақ алты айлық жылдық өсу қарқыны алдағы рецессияны білдірмейді», – деді Conference Board бизнес-цикл индикаторларының аға менеджері Юстина Забинска-Ла Моника.
Экономистердің көбі рецессияға қатысты алаңдаушылық шамадан тыс жоғары, деп санайды. Сонымен, өткен аптада Goldman Sachs Group 2025 жылы АҚШ-тағы рецессия ықтималдығын 5%-ға, 25%-дан 20%-ға дейін төмендетті. Bank of America экономистері де өткен жылы алғаш рет АҚШ экономикасы бойынша пессимистік болжамын өзгертті. Олар енді рецессия қаупін көрміп отырған жоқ және 1,5-2% өсімді күтеді.
