![](https://cdn-kz.kursiv.media/wp-content/uploads/2024/08/cover-site-123-1-3-1536x864-1-1024x576.png)
Астанада ауыр жүк көліктеріне 3 миллион 700 мың теңгеге дейін айыппұл салынуы мүмкін. Қыркүйек айында қалада көлік өлшейтін автоматтандырылған жүйе іске қосылады. Бұл туралы Астана қаласының әкімдігі хабарлады.
Әкімдіктің мәліметінше, бұл жүйе ауыр жүк көліктерінің салмағын бақылауға, қаланың көлік инфрақұрылымының жалпы деңгейін жақсартуға, өзге де көліктердің кедергісіз жүруі үшін қолайлы жағдайлар жасауға мүмкіндік береді.
Жүйе қазірдің өзінде сынақ режимінде жұмыс істейді. Автоматтандырылған өлшеу жүйесі Павлодар, Қарағанды, Қостанай, Көкшетау, Қосшы қалаларынан келетін кіреберісте тұр. Сондай-ақ Қараөткел және Малотимофеевка кенттері тарапынан орнатылған. Соңғы айда 10 мыңнан астам бұзушылық тіркелді.
«Қазақстан Республикасының автомобиль жолдарымен жүруге арналған автокөлік құралдарының рұқсат етілген параметрлерін бекіту туралы» ҚР ИИДМ-нің 2015 жылғы 26 наурыздағы №342 бұйрығына сәйкес ауыр жүк көліктеріне айыппұл төменде келтірілген нормадан (тоннамен) асып кетсе салынады:
– үш осьті (М3 санатындағы буынды автобустарды қоспағанда) – 25 тонна;
– төрт осьті, оның ішінде екі басқарылатын осі бар – 32 тонна;
– бес осьті – 38 тонна
– алты немесе одан да көп осьтері бар – 44 тонна.
Осылайша, жалпы салмақ жүктің де, көліктің де салмағын қамтиды.
Айналып өту және өлшеуден жалтару тіркеледі, ал талаптарды бұзғаны үшін әкімшілік жаза қарастырылған. Көлік құралдарын өлшеу қозғалыс барысында жүзеге асырылады. Айыппұлдардың мөлшері оське шаққандағы салмақтың арту дәрежесіне байланысты және кәсіпкерлік түріне байланысты – шағын, орта немесе ірі – 40 АЕК-тен (147 мың 680 теңге) 1000 АЕК-ке (3 млн 692 мың теңге) дейін өзгеруі мүмкін, –делінген хабарламада.
Қазақстанда ауыр жүк көлігін жүргізушілерге 100 миллион теңгеге жуық айыппұл салынды. Бүгінде елімізде 450 мыңнан астам жүк көлігі тіркелген. Оның 60 мыңнан астамы самосвалдар.
Естеріңізге сала кетейік, ауыр жүк көліктеріне инертті материалдарды тасымалдауға рұқсат етілген норма 25 тоннаны құрайды.