Павел Дуровқа көмек көрсету үшін алаяқтық жолмен ақша жиналып жатыр. Бұл туралы «Лаборатория Касперского» киберқауіпсіздік компаниясы хабарлады.
Киберқауіпсіздік компаниясының мамандары Telegram негізін қалаушы Павел Дуровты заңды қорғауға қаражат жинау мақсатында жіберілген ағылшын тіліндегі электрондық пошта хатын анықтады. Компания өкілдері бұл хаттарды алаяқтық әрекет ретінде сипаттап, оның мақсаты халықты алдап, олардың қаражатын иемдену екенін ескертті.
Хаттарда алаяқтар өздерін құқық қорғау ұйымдарының өкілдері ретінде көрсетіп, Павел Дуровтың бостандығын қамтамасыз ету және әлемдегі адамдардың құқықтарын қорғау үшін ақша жинау қажет екенін мәлімдейді. Алаяқтар адамдарды криптовалюта түрінде (BTC, ETH және TRX) қаражат аударуға шақырады, көрсетілген әмияндарға ақша жіберуді ұсынады, – дейді «Лаборатория Касперского» маманы Андрей Ковтун.
Сонымен қатар алаяқтар пошта фильтрлерінен өтуді жеңілдету үшін хаттардың мәтіндеріндегі сөздерді өзгертіп отырады. Олар «көмектесу» және «қолдау көрсету» (ағылшын тілінде «help» және «support»), «қайырымдылық жасау» және «қаражат жинау» («donate» және «raise») сияқты синонимдерді пайдаланады. Хаттарды жіберген ұйымдардың атаулары да жиі өзгереді.
Бұл жағдай интернет қолданушыларын күмәнді хаттар мен хабарламаларға жауап бермеуге шақырады. Әсіресе, криптовалюта арқылы ақша аудару сұралған жағдайда ақпаратты мұқият тексеру қажет.
Еске сала кетейік, 24 тамыз күні кешке Ле Бурже әуежайына жеке ұшағымен қонған Дуровты Франция билігі тұтқындаған.
Францияның Дуровты іздеуге жариялау туралы бұйрығын сот полициясының ұлттық басқармасы алдын ала тергеу негізінде шығарды. Енді прокуратура шешім қабылдаса, жуырда сот отырысы басталады. Жандармерия тергеушісі оның тергеу абақтысында отыратыны анық екенін айтқан.
