Ұлттық валюта бағамы 1 долларға 900 теңгеге дейін құнсыздануы мүмкін бе? Тимур Сүлейменов жауап берді
Базалық мөлшерлемеге қатысты баспасөз конференциясы барысында Ұлттық банк төрағасы Тимур Сүлейменов 2024 жылға арналған теңгенің орташа жылдық бағамы бір долларға 460 теңге болып белгіленгенін атап өтті.
«Бірінші жартыжылдықта бағам бір долларға 440 теңгеге дейін төмендегенін көрдік, қазір ол 480 теңгеге дейін көтерілді. Бірақ біз бір жыл ішінде орташа бағам шамамен 460 теңге болады деп есептейміз», – деді бас банк басшысы.
Сүлейменов валюта бағамы нарықтық жағдайларға, оның ішінде валютаға сұраныс пен ұсынысқа байланысты болатынын да атап өтті.
«Бұл қосымша нарықтық фактор ретінде көбінесе нарық конъюнктурасына және Ұлттық қордан түсетін трансферттердің көлеміне байланысты болады», – деді ведомство басшысы.
Бұл ретте БАҚ өкілдері «Ұлттық валюта бағамы 1 долларға 900 теңгеге дейін құнсыздануы мүмкін бе? Елімізде әкімшілік девальвация жоспарланып отырған жоқ па?» деп сұрады.
Сүлейменов Ұлттық банк теңгенің нарықтық бағамын қалыптастыруға араласпайтынын атап өтті.
«Ұлттық банк ақша-кредит саясатына сәйкес теңге еркін өзгермелі айырбас бағамы негізінде қалыптасады. Ал еркін айырбас бағамы режимінде әкімшілік девальвациялар болмайды», – деп нақтылады бас банк басшысы.
Еске сала кетсек, 2024 жылғы 12 маусымда Мәскеу биржасы мен оның құрамындағы Ұлттық клиринг орталығы АҚШ-тың санкциясымен бұғатталған еді. Содан кейін рубль бағамы құлдырады. Кейін теңгенің долларға шаққандағы бағамы да құнсыздана бастады.
Ұлттық банк басшысының айтуынша, бағам «негізгі көрсеткіштерге» оралған. Оның пікірінше, оған дейінгі байқалған нығаю Ұлттық қордан валюта сатуға байланысты болды, ал қазір олар төмендеуде.
