Шереметьево әуежайында қалып қойған алматылық балалардың билеттері қалпына келтірілді

Мәскеудегі Шереметьево әуежайында қалып қойған алматылық оқушылар тобына бұрынғы ескірген билеттерін жаңартып берді. Бұл туралы Қазақстан Республикасының бала құқықтары жөніндегі уәкілі Динара Закиева мәлімдеді.

Динара Закиеваның айтуынша, оқушылар бүгін, 31 тамыз күні, Қазақстанға оралады. Сондай-ақ, бұл мәселені шешу оңай болмағанын айтады, себебі ескірген билеттер қайтадан сатылымға шығарылған еді.

«Осы жағдай бойынша Ресей Федерациясындағы бала құқықтары жөніндегі уәкіл Мария Львова-Беловаға хабарластым. Нәтижесінде әуекомпания ішкі әуежай процедураларын орындауға байланысты рейске кешіккен 17 адамнан тұратын топтың билеттерін қалпына келтіруге келісті. Оқушылар мен оларды ертіп жүргендер бүгін Қазақстанға ұшып кетеді деп жоспарланып отыр», — деп жазды Закиева өзінің Facebook парақшасында.

Еске сала кетейік, бұған дейін «Романтик» лагерінің директоры Александр Шевченко «Курсив» басылымына берген сұхбатында, өзінің балалар тобымен Санкт-Петербургке демалысқа ұшып барғанын айтқан болатын. «Аэрофлоттың» жергілікті бөлімшесі оларға Мәскеудегі Шереметьево әуежайында арзан бағамен трансфер ұсынған. Алайда, Мәскеуге жеткеннен кейін, балалар мен Александр ұзақ тексеруден өткен, сол себепті топ рейске кешігіп қалды.

Александр Шевченконың айтуынша, ол 18 баланың барлығына жаңа билеттер сатып ала алмаған. Сонымен қатар, Қазақстанның банк карталары Ресей аумағында жұмыс істемеген. Лагерь директоры Қазақстанның Ресейдегі елшілігіне көмек сұрап жүгінгенімен, олардан да көмек ала алмаған.