Стратегтер қыркүйек айында америкалық акциялардың өсетініне сенімді. Ал Еуроодақтағы компаниялардың табысы төмендеп жатыр. Қытайда экспорт пен ішкі сұраныстың төмендеуіне байланысты өнеркәсіптегі іскерлік белсенділік индексі әлі де қарқын ала алмай отыр. Осы және өзге де тақырыптар туралы шолуымыздан оқыңыз.
Қыркүйек айындағы болжам: ФРЖ ставка бойынша шешім қабылдағанға дейін АҚШ-тағы акциялар өсе бермек
Қыркүйек АҚШ қор нарығы үшін қолайлы болуы мүмкін, деп жазды Reuters. 17-18 қыркүйекте өтетін ФРЖ отырысында пайыздық мөлшерлеменің төмендеуі аясында басымдық технологиялық компаниялардың акцияларына шоғырланбақ. Жақын болашақтағы тренд осы аптада жарияланатын АҚШ-тың тамыз айындағы жұмыспен қамту деректеріне де байланысты болмақ.
Бұрын Nvidia S&P 500 индексінің жылдық өсімінің шамамен төрттен бірін – 18,4%-ын қамтамасыз етті. Бірақ қазір инвесторлар қаражатты бигтехтен барынша жылыстатып жатыр. Қаражатты аса танымал емес акцияларға, соның ішінде шағын компанияларға салады. Олар төмен пайыздық мөлшерлемелерден пайда көреді деп күтіліп отыр.
Charles Schwab есептеулері бойынша S&P 500-ге кіретін акциялардың 61%-ы кейінгі айда индекстен асып түсті. Ал өткен жылы мұндай үлес 14%-ды құраған еді. Сонымен қатар «Таңдаулы жетілік» 11 шілдеден бастап S&P 500 индексіндегі өзге 493 акциядан 14%-ға артта қалды.
Қысқасы, Harbor Capital-дың портфельдік менеджері Джейсон Алонзоның айтуынша, инвесторлар технологиялық компаниялардың акцияларынан бас тартуы екіталай. Әсіресе құбылмалылық оларға қағаздарды арзанырақ бағаға сатып алуға мүмкіндік беріп отырғанда бұлай болуы қисынсыз. LSEG мәліметтері бойынша, технологиялық компаниялардың акциялары 2025 жылға дейін әр тоқсанда нарықтан жоғары пайданың өсуін көрсетеді деп күтіліп отыр.
Еуропадағы ралли баяулап келеді – одан әрі не болмақ?
Bloomberg Еуропаның қор нарығындағы жағдайға талдау жүргізді. Тамыз айында АҚШ-тың ірі технологиялық компанияларынан капиталдың жылыстауы еуропалық акцияларға пайда әкелді. Алайда бұл ұзақ мерзімді тенденцияға айналуы екіталай. Өйткені еуроаймақ экономикасының баяулауы еуропалық компаниялардың пайдасының өсуіне күмән келтіреді.
Еуропадағы картинаның өзі әртүрлі қалыптасып отыр. Өйткені Stoxx 600 рекордтық деңгейге жетті. Дегенмен, бұл көрсеткіш тамыз айында S&P 500-ден төмен болды. Жылдық мәнде индекс 9%-ға артта қалып отыр. Мұндай жағдай қатарынан екінші жыл қайталынып отыр.
«АҚШ-тағы акциялар тартымды болып қала береді. Өйткені АҚШ-тың табыс әлеуеті ЕО-ға қарағанда жоғары», – деп атап өтті Pictet Asset Management Ltd компаниясының аға инвестициялық менеджері Евгения Молотова. Оның айтуынша, Еуропаның Қытай импортына тәуелділігі оны жаһандық рецессия жағдайында да қолайсыз жағдайға душар етеді.
Citigroup Inc. индексі еуроаймақтағы экономикалық деректер маусымнан бері көңіл көншітпейтінін көрсетіп отыр.
Қытай өнеркәсібіндегі іскерлік белсенділік индексінің әлсіздігі тұтынушыларды ынталандыру қажеттілігін күшейтеді
Сенбіде жарияланған Қытай Ұлттық статистика бюросының ресми сауалнамасына сәйкес, тамыз айының қорытындысы бойынша елдегі өндірістік белсенділік сату бағасының төмендеуі және тапсырыс көлемінің қысқаруы аясында алты ай бұрынғы ең төменгі деңгейге дейін төмендеді. Атап айтқанда, сатып алу менеджерлерінің индексі шілдедегі 49,4-тен 49,1-ге дейін төмендеді. Индекс қатарынан алтыншы рет төмендеп отыр. Ал төртінші ай қатарынан 50-ден төмен қалыптаса бастады. Reuters сауалнамасында көрсетілген 49,5 деген орташа болжамға сәйкес келмеді.
Өндірушілер сату бағасы 14 ай ішіндегі ең нашар баға болғанын, шілдедегі 46,3-тен 42-ге дейін төмендегенін хабарлады. Экспорттық тапсырыстардың ішкі индекстері теріс аумақта қалып отыр, ал өндірушілер жұмыс күшін жалдауды тоқтатуға басымдық беріп келеді.
Өндірушілер арасындағы көңіл-күй бұлыңғыр болып қала береді. Өйткені жылжымайтын мүлік нарығындағы көпжылдық дағдарыс ішкі сұранысты тежейді, ал батыстық шектеулер Қытай экспортына әсер етеді. ҚХР билігі инфрақұрылымдық жобаларға қаражат құю стратегиясынан бас тартуға және оның орнына үй шаруашылықтарын тұтынуды ынталандырудың жаңа шараларын қабылдауға келісе ме деген сұрақ ашық күйінде қалып отыр.
Экономистер Қытайдың тұтыну нарығын жандандырудың нақты жоспарларын күту үстінде. Әзірге билік тек осындай мемлекеттік қолдау бағдарламасын қабылдауға уәде беріп отыр.
Economist Intelligence Unit аға экономисі Сюй Тяньчэнь Қытай нарығының ауқымы мен қажетті инвестицияның үлкен мөлшерін көрсете отырып, қандай да бір шаралар қабылданатынына күмән келтіреді. Ішкі сұранысты жандандыруға бағытталған кез келген күш-жігер жылжымайтын мүлік саласындағы мәселелерді шешуде тиімсіз болуы мүмкін, деп ескертті сарапшы.
Тяньчэнь 2024 жылдың қорытындысы бойынша Қытай ЖІӨ өсімі бойынша 5% деңгейінде нысаналы көрсеткішке жете алмайды деп есептейді.
Коммерциялық жылжымайтын мүлік иелері 1,5 трлн доллар қарызды өтеу мәселесіне тап болды
Jones Lang LaSalle Inc. есебінше, 2025 жылдың соңына қарай кеңселер, тұрғын үй кешендері және басқа да коммерциялық жылжымайтын мүлік иелері бүкіл әлем бойынша 1,5 трлн доллар қарызды төлеуге мәжбүр болады әрі қарыздың төрттен бір бөлігін қайта қаржыландыру қиын соқпақ. Тек АҚШ-тың өзінде жалпы құны 80 млрд доллардан асатын активтерге банкроттық қаупі төніп тұр, деп жазды Bloomberg.
Мәселе кепіл ғимараттары құнының төмендеуі аясында пайыздық мөлшерлемелердің өсуіне байланысты туындаған. Нәтижесінде, пәтер иелері қайта несие алуға тырысады. Көбінесе акционерлік капитал жаңа қарызды қамтамасыз етеді. Көп пәтерлі үйлер өтеу мерзімінің 40%-ын құрайды. Олардың көптеген активі «жеңіл ақша» дәуірінде үш жылдық өзгермелі мөлшерлемемен салынған немесе сатып алынған. Алайда 2020 жылдан бері пайыздық мөлшерлемелердің өсуі жалдау кірісінің көп бөлігін еңсергенін ұмытпайық.
MSCI Real Assets есептеулеріне сәйкес, АҚШ-тағы жалпы құны шамамен 95 млрд долларды құрайтын жылжымайтын мүлік нысандары «қиын жағдайда» қалмақ. Алайда коммерциялық жылжымайтын мүлік нарығындағы проблемаларды инвесторлар банктер үшін жүйелік проблема ретінде қарастырмайды. Сарапшылар пайыздық мөлшерлемені төмендету әлеуетін көрсетеді. Бұл қарызды қайта қаржыландыруға және үлкен күйзелістерді болдырмауға көмектеседі.
