Елімізде жүргізуші куәлігінің берілуін қатаң қадағалайтын болады, бұл туралы ел халқына жолдауында Мемлекет басшысы Қасым-Жомарт Тоқаев айтты.
«Жүргізушілерді даярлау деңгейінің де төмендеп кеткені жасырын емес. Жүргізуші куәлігін арнайы оқымай-ақ алатын жайттар бар. Үкімет, әкімдер, Ішкі істер министрлігі батыл қадам жасауы керек. Депутаттар бұл мәселені назарда ұстауға тиіс» – деді Президент.
Сондай-ақ, мемлекет басшысы автокөліктердің техникалық жағдайына да бақылау жасау туралы айтты:
Жол-көлік инфрақұрылымын жақсарту және интеллектуалдық жүйені енгізу арқылы жол қауіпсіздігін қамтамасыз етуге болады. Бұл – жергілікті ғана емес, республикалық жолдарға да қатысты мәселе. Осы салаға жауапты мекеме автокөліктердің техникалық жағдайына тиісті бақылау жасауы қажет, деді Тоқаев.
Еске сала кетейік, бұған дейін Қазақстанда жүргізуші куәліктері мен көлік нөмірлерінің бағалары өзгергені туралы жазған едік.
Қазақстанның Ішкі істер министрі жүргізуші куәліктерін, көлік құралдарын мемлекеттік тіркеу туралы куәліктерді және мемлекеттік нөмір белгілерін дайындау қызметтерінің жаңа бағаларын бекітті.
