Алматы қаласында 12 қыркүйектен бастап 16 қыркүйекке дейін Төле би көшесі Панфилов көшесінен Абылай хан даңғылына дейінгі аралықта көлік қозғалысы шектеледі. Бұл туралы қалалық әкімдік хабарлады.
Әкімдіктің мәліметінше, 12-16 қыркүйек аралығында Астана алаңында қала күнін мерекелеу аясында ұйымдастырылатын іс-шараларға дайындық жұмыстары жүргізіледі.
«Түсіністік танытып, жол жүру бағытын алдын ала ойластыруларыңызды сұраймыз. Сондай-ақ жол қозғалысы ережелерін қатаң сақтауға шақырамыз», – делінген хабарламада.
Еске сала кетейік, бұған дейін Алматыда қала күніне орай 150-ден астам мерекелік іс-шара өтетіні туралы жазған едік.
Қала күнін мерекелеу аясында 14 қыркүйек күні сағат 16:00-де «Астана» алаңында LuxFM радиостанциясының фестивалі өтеді. Сахнада Мирас Жүгінісов, Айқын Төлепберген, Jazzdauren, Adam және басқа да танымал артистер өнер көрсетеді. Кештің басты қонағы – Грэмми сыйлығының иегері, продюсер DJ Imanbek.
Сондай-ақ «Астана» алаңында эстрада жұлдыздарының қатысуымен Almaty Cover Show өтеді. Концерт 17:00-де басталады, оған Нағима Есқалиева, Мейрамбек Беспаев, Kalifarniya, RaiM, Нұрлан мен Мұрат, ARO, Ерболат Құдайберген, Қайрат Түнтеков, Еркін Нұржанов, Айдар Тұрғанбай және т.б. артистер қатысады.
Сонымен қатар мерекелік іс-шаралар қаланың барлық ауданында өтеді. Басқа да іс-шаралар жоспарының толық нұсқасы Алматы қаласы әкімдігінің сайтында, сондай-ақ әкімдіктің Instagram парақшасында, Алматы Мәдениет басқармасы мен аудандық әкімдіктердің ресми парақшаларында жарияланған.
