Түркі мемлекеттері 34 әріптен тұратын ортақ әліпби нұсқасын мақұлдады
Түркі мемлекеттері 34 әріптен тұратын ортақ әліпби нұсқасын мақұлдады, деп хабарлайды TRT haber.
Академияның мәліметінше, кездесудің негізгі мақсаты 1991 жылы ғалымдар ұсынған бірыңғай әліпби жобасын аяқтау болды. Комиссия екі жылдық жұмыстан кейін, барлық түркі тілдерінің ерекшеліктерін ескеретін әліпбидің жетілдірілген нұсқасын ұсынды.
«Комиссия мұқият талқылау жүргізіп, әліпби жобасын толықтыруды қажет ететін тұстарын анықтады. Нәтижесінде бірыңғай түркі әліпбиін енгізу туралы ұсыныс мақұлданды», – делінген хабарламада.
Академиктердің айтуынша, 34 әріптен тұратын әліпби түрлі түркі тілдерінің фонетикалық ерекшеліктерін ескеріп жасалған. Әрбір әріп түркі тілдеріне тән бірегей дыбыстарды белгілейді, бұл жаңа жазудың икемділігі мен әмбебаптығын қамтамасыз етеді. Сарапшылардың пікірінше, бірыңғай әліпби әзірлеу білім беру және мәдениет саласындағы ынтымақтастықты күшейту жолындағы маңызды қадам болмақ. Түркі академиясы бұл жетістіктің тарихи маңызы бар екенін атап өтіп, ғылыми және білім беру мекемелерін бастаманы қолдап, оның енгізілуіне ықпал етуге шақырады.
Түркі академиясы — Түркі мемлекеттері ұйымының аясында құрылған халықаралық ұйым, оған Әзербайжан, Қазақстан, Қырғызстан және Түркия кіреді. Сонымен қатар, Венгрия мен Өзбекстан байқаушы мәртебесіне ие. Ұйымның штаб-пәтері Астанада орналасқан және оның негізгі мақсаты — түркі елдері мен аймақтары арасында ғылыми және білім беру саласындағы ынтымақтастықты дамыту.
