Энергетика министрлігі 27 қарашада көмірсутектер бойынша жер қойнауын пайдалану құқығын беру жөнінде электронды аукцион өткізеді. Оның шарттары туралы хабарламаны сайтта жариялады.
Министрліктің мәліметі бойынша аукционға 9 жер қойнауы учаскесі шығарылды. Екі ай ішінде аукционға қатысуға өтініш беруге болады. Оған қатысқысы келетіндер «Ақпараттық-есептеу орталығы» АҚ электрондық аукциондар операторының сайтынан өтініш бере алады (сілтеме: www.e-kazyna.kz).
Аукцион жарияланған учаскелер:
- Ақтөбе облысындағы Сарлы Оңтүстік қанат.
- Ауданы – 0,66 шаршы км. Зерттеу тереңдігі – триас шөгінділерінің табанына дейін
- Атырау облысындағы Қиғаш учаскесі.
- Ауданы – 1154,40 шаршы км.
- Ұлытау облысындағы Бестақыр учаскесі. Ауданы – 4711,89шаршы км.
- Атырау және Маңғыстау облыстарындағы Азнагүл учаскесі. Ауданы – 109.61 шаршы км.
- Ақтөбе облысындағы Батыс Жарқамыс II учаскесі. Ауданы – 941,68 шаршы км.
- Қызылорда облысындағы Солтүстік Жамансу учаскесі. Ауданы – 334,09 шаршы км.
- Атырау облысындағы Құлсары учаскесі. Ауданы – 1131.44 шаршы км (алып тастаусыз).
- Батыс Қазақстан, Ақтөбе облысындағы Шыңғыс-Телсу учаскесі.
- Маңғыстау облысындағы 5-Үстірт учаскесі. Ауданы – 1816.23 шаршы км.
Аукцион жеңімпаздары учаскелер бойынша мына талаптарды орындауға міндетті:
– келісімшарт жасалған сәттен бастап бір жыл ішінде барлау жұмыстарының жобасын жасауға;
– келісімшарт жасалған сәттен бастап 3 жыл ішінде 2Д сейсмикалық барлау бойынша ең төменгі талаптарды орындауға;
– келісімшарт жасалған сәттен бастап 4 жыл ішінде кемінде бір ұңғыманы бұрғылау бойынша ең төменгі талаптарды орындау.
Одан бөлек барлау кезеңінің ұзақтығы алты жылдан аспауы керек. Өндіру кезеңінің барынша ұзақтығы – жиырма бес жылдан аспайды, оның ішінде дайындық кезеңінің ұзақтығы үш жылдан аспауы қажет.
Аукцион 2024 жылдың 27 қарашасында Астана уақыты бойынша сағат 10:00-ден 17:00-ге дейін өтеді.
