Әлеуметтік желіде Қазақстанның Ұлттық қауіпсіздік комитетінің қызметшісі қырғыз көкпаршысына қысым көрсеткені туралы ақпарат тарады. Осыған орай ҰҚК баспасөз қызметі мәлімдеме жасады.
«2024 жылғы 12 қыркүйекте БАҚ-та және әлеуметтік желілерде Қырғызстан құрамасының көкпар ойыншысына ҰҚК қызметкері қысым көрсеткені туралы ақпарат таралды. Бұл ақпарат шындыққа сәйкес келмейді»,- делінген баспасөз хабарламасында.
Баспасөз қызметінің хабарлауынша, комитет қызметкерлері 5-ші Дүниежүзілік көшпенділер ойындарын өткізу барысында қоғамдық тәртіпті қамтамасыз етуге қатыстырылмаған. Осы орайда ҰҚК тек ресми ақпарат көздеріне сенуге шақырады.
Еске сала кетсек, Астанада 6-13 қыркүйек аралығында V Дүниежүзілік көшпенділер ойындары ұйымдастырылды. Бұл сайыстың ашылу салтанаты 6 қыркүйек күні өткен болатын.
Кеше 12 қыркүйек күні V Дүниежүзілік көшпенділер ойындарында қазақ көкпаршылары чемпион атанды. Тартысты ойында 5:4 есебімен Қазақстанның көкпаршылары жеңіске жетті.
Айта кетейік, көкпарға 9 мемлекет – Қазақстан, АҚШ, Ресей, Өзбекстан, Қырғызстан, Мажарстан, Қытай, Моңғолия мен Түркия командалары келді.
