Дивидендтер төлеу және акциялар құнын арттыру бойынша салық жеңілдіктері алынбайтын болды
Ұлттық экономика вице-министрі Азамат Әмрин дивидендтер төлеу және акциялар құнын арттыру бойынша салық жеңілдіктері алынбайтынын мәлімдеді.
«Мұндай ұсыныс болған. Талқылау барысында бұл мәселе көтерілген. Бірақ парламентке өткен заң жобасында мөлшерлеме 10 пайыз деп көрсетіліп отыр. Басында мөлшерлемені бес пайызға дейін азайтамыз деп ойлағанбыз», – деді Азамат Әмрин.
Ұлттық экономика вице-министрі талқы кезіндегі салық жеңілдігінің негізгі мәнін түсіндірді. Мөлшерлеме төмендегенімен, барлық жеңілдіктер қысқартылуы тиіс болған.
«Өкінішке қарай, біз барлық жеңілдіктерді алып тастай алмаймыз. Бізде KASE, Астана хаб және басқа да құралдар да бар. Соның аясында босату (салықтан) қарастырылған. Бұған қатысты заңнамалар бар. Сондықтан оларды қысқарта алмаймыз. Осыған орай, 10 пайыздық мөлшерлеме белгіленді. Десе де, бізде 10 миллионға дейінгі дивидендтерден босату көзделген», – деді вице-министр.
Оның баяндамасында кен орнындарында салықты үнемдеуді инвестицияға және босатылған қаражатты дивидендтерге емес, өңірдің әлеуметтік-экономикалық дамуына бөлу жөніндегі қарсы міндеттемелер бекітілетіні айтылған.
Мұның алдында Қаржы министрлігінің бизнеске берілетін салық жеңілдігін қайта қарайтыны туралы жазғанбыз.
