Абай облысындағы KAZ Minerals тобына қарасты шахтада бір адам опат болды
Абай облысында орналасқан KAZ Minerals компаниясына қарасты Орлов шахтасында апат салдарынан бір адам опат болды. Бұл туралы Топтың баспасөз қызметі хабарлады. Өндіріс орнында тау-кен шахтасы опырылып, екі жұмысшы жарақат алған. Оқиға 19 қыркүйек күні шамамен күндізгі сағат 14.20-да болды.
Дегенмен компания бұл туралы 19 қыркүйек күні кешкі уақытта ғана хабар таратты.
«Алған жарақаттардың салдарынан зардап шеккендердің бірі ауруханада қайтыс болды. Екінші қызметкер медициналық көмек көрсетілгеннен кейін үйіне қайтты», – делінген хабарламада.
KAZ Minerals Тобы бұл оқиғаның мән-жайын анықтау үшін арнайы комиссия құрылғанын және компания директорлар кеңесінің төрағасы Олег Новачук Абай облысына жеткенін хабарлапты. Сонымен қатар хабарламада компания қаза болған қызметкердің отбасының қайғысына ортақ екені және жан-жақты көмек көрсететіні жазылған.
Айта кету керек KAZ Minerals тобы елдегі ең бай кәсіпкерлердің бірі Владимир Ким мен Олег Новачукқа тиесілі. Ким компания акцияларының 63,5%-на ие. Оның байлығы – 4,6 млрд доллар. Компания директорлар кеңесінің төрағасы KAZ Minerals акцияларының 36,5%-ын меншіктеген.
Компанияның 2023 жылғы өндірістік нәтижесіне сәйкес, өткен жылы 403 мың тонна мыс өндіріп, компания тарихындағы ең жоғары көрсеткішке жеткен болатын.
KAZ Minerals тобы операциялық іс-қызметін Абай облысында орналасқан Ақтоғай және Павлодар облысындағы Бозшакөл ашық кеніштерде жүргізеді. Сонымен қатар, Шығыс Қазақстан, Абай облыстарында үш кеніш пен кен байыту фабрикалары бар. Сонымен қатар, Қырғызстандағы Бозымшақ мыс-алтын кенішінде кен өндіреді.
