Қазақстанда жоғары өнім беретін жаңа мақта сұрыптары іріктелмек
Қазақстанда мақтаны селекциялау жұмыстары басталды. Ұлттық аграрлық ғылыми-білім беру орталығы сұрыптау жұмысын ұйымдастыруда.
Бұл бағыттағы жұмыс 24-25 сәуірде басталған. Селекциялық питомниктерде будандастыру үшін жаңа үлгілер мен гибридті комбинациялар егілді.
«Жоба бойынша 33 станциялық үлгі, 26 гибридті комбинация және биологиялық питомниктен 420 үлгі қатысады. Сондай-ақ М-4011 және М-5027 сорттарының 40 тонна элиталық тұқымын алу жоспарланған», – деп хабарлады АШМ.
Орташа талшықты мақта сұрыптары гектарына 45-50 центнерден өнім беруге тиіс. Мақта уақытынан ерте піседі. Өнімді 110-117 күннен кейін жинап алуға болады.
Талшық ұзындығы – 33-34 мм. Оның шығымы 38-40% шамасында. Кейінгі селекциялық жұмыстар үшін үлгілерді іріктеу жұмыстары басталды.
«Бағдарлама қорытындысы бойынша Қазақстан ауыл шаруашылығы сынақтары мен сорттарының мемлекеттік комиссиясына жаңа сорт беріледі. Вегетация кезеңінде өсімдіктерге тыңайтқыш енгізу, қатараралық өңдеу, зиянкестермен күрес және суаруды қоса алғанда, кешенді күтім жасалды», – делінген ведомство сайтында.
Мақтаны жинау қыркүйектің басында басталды. Жоба қорытындысында елдің әртүрлі топырақ-климаттық жағдайына бейімделген, бәсекеге қабілетті мақта сұрыптары іріктеледі.
Қазақстан мен Қытай ауыл шаруашылығы саласында бірігіп жұмыс істей бастады. Көктемде Түркістан облысында 1 мың гектар алқапқа тамшылатып суару әдісі арқылы жоғары сұрыпты мақта тұқымы өсірілетіні белгілі болды. Бірінші кезеңде мақта кластерін құру, одан кейін толығымен Қазақстанда жасалған маталардан жұқа, жоғары сапалы жейде және үй тоқыма бұйымдарын шығару жоспарлануда. Қытайдың жібек жіптерін шығаратын Lihua Spinning Technology компаниясы кеңесші ретінде жұмысқа тартылды.
Ауыл шаруашылығы министрі Айдарбек Сапаров суды көп қажет ететін дақылдарды егу көлемі де азайғанын жеткізді. Мәселен, күріш 6,9 мың гектарға, мақта 16 мың гектарға қысқарған.
