Германия тарапынан Қазақстаннан жеткізілетін мұнай көлемін 1,2 млн тоннадан 2,5 млн тоннаға дейін ұлғайту туралы өтініш түсті. Бұл туралы ҚР Энергетика министрі Алмасадам Сәтқалиев мәлім етті.
«Жыл соңына дейін 1,2 млн экспорттауды жоспарлап отырмыз. Германия тарапынан жалпы көлемді 2,5 млн тоннаға дейін арттыру туралы өтініш түсті», – деді ведомство басшысы.
Бұл ретте Қазақстан экспортты 2,5 млн тоннаға дейін арттыра ала ма? Министр мұны нақтыламады.
Бұған дейін 2024 жылы қазақстандық «ҚазТрансОйл» компаниясы 1,2 млн тоннаға дейін қазақстандық шикізатты «Транснефть» ЖАҚ құбыры жүйесі арқылы Германияға жеткізу үшін Адамова Застава пунктіне қарай жөнелтуді жоспарлап отыр.
2024 жылдың қаңтар-сәуір аралығында «ҚазТрансОйл» АҚ Германияға 420 мың тонна қазақстандық мұнай тасымалдады. Бұл өткен жылдың сәйкес кезеңінен 330 мың тоннаға артық.
2023 жылдың аяғында «Дружба» құбыры арқылы Германия бағытында 993 мың тонна қазақстандық «қара алтын» («Қарашығанақ Петролеум Оперейтинг» компаниясының ресурстарынан) тасымалданды.
2022 жылы Германия үкіметі Қазақстанға PCK Raffinerie (Шведт қ.) зауытына «Дружба» құбыры арқылы Қазақстан шикізатын жеткізу туралы өтініш білдірген. «ҚазМұнайГаз» ҰК АҚ және Rosneft Deutschland сол жылдың маусым айында Raffinerie мұнай өңдеу зауытына шикі мұнай жеткізу туралы келісімшартқа қол қойды. Құжатқа сәйкес, «Қарашығанақ» кен орнынан айына 100 мың тонна көлемінде шикізат тасымалдануы керек еді. Кейін бұл көлем атты.
«ҚазТрансОйл» АҚ – магистральдық мұнай құбыры бойынша ұлттық операторы. «ҚазМұнайГаз» ҰК АҚ тобына кіреді. Ұзындығы 5,4 мың км әртараптандырылған магистральдық құбыры желісіне иелік етеді.
