«Самұрық-Қазына» қоры тамыз айының соңында Tau-Ken Temir және Silicon Mining еншілес компанияларының 55% үлесін қатарлық Metaleen Investments Holdings LLC компаниясына 4,9 млрд теңгеге сатты. Бұл туралы Қазақстан қор биржасы алаңында жарияланған қордың есебінде жазылған.
«Қор еншілес компанияларына бақылауды жоғалтты және қалған 45% үлесті қауымдасқан компанияларға инвестициялайды. Қауымдасқан компанияларға салынған инвестициялардың әділ құнын бағалау 2024 жылы аяқталады», – деп жазылған компания қаржылық есебінде.
Silicon Mining компаниясы Қарағанды облысындағы Ақтас кен орнында кварц өндірумен айналысады. Алынған шикізат Қарағанды қаласындағы Tau-Ken Temir серіктестігіне қарасты металлургиялық кремний шығаратын зауытқа тасымалданады.
2024 жылдың қаңтар-маусым айларында«Самұрық-Қазына» қорының таза пайдасы 20,6%-ға өсіп, 1,43 трлн теңгені құрады. Екінші тоқсандағы табысы 25%-ға немесе 726,8 млрд теңгеге дейін өскен.
Еске сала кетсек, «Самұрық-Қазына» қоры «Қашаған» кен орнында газ өңдеу зауытын салып жатқан GPC Investment компаниясын QazaqGaz-ға берді.
Бұған дейін «Самұрық-Қазына» Қатардың Power International Holding холдингіне «Мобайл Телеком-Сервис» ЖШС-ны сататынын хабарлаған. Ол Tele2 және ALTEL брендтеріне иелік етеді. Үшжақты келісімге тараптар Қазақстан Президентінің Қатарға ресми сапары шеңберінде қол қойған.
