Милан қаласында екі елдің компанияларының байланысын нығайтуға арналған «ҚАЗАҚСТАН – ИТАЛИЯ: Қазақстан жолындағы сауда және инвестициялық мүмкіндіктер» атты форум басталды. Оған Қазақстаннан бір топ шенеунік қатысты.
Форум аясында энергетика, агроөнеркәсіп кешені, туризм, фармацевтика және технологиялық инновациялар бойынша тәжірибе алмасу көзделген.
«Сауда министрі Арман Шаққалиев Италия Қазақстан үшін Еуропалық Одақтағы негізгі сауда серіктестерінің бірі екенін және тауар айналымы бойынша үздік үштікке кіретінін атап өтті. Ынтымақтастықты нығайту аясында Қазақстан италиялық компаниялардың қатысуымен бірлескен кәсіпорындарда өндірілген өнімді ілгерілетіп, тауарлардың халықаралық нарықтағы позициясын күшейтетін «Made with Italy» тұжырымдамасын енгізуді ұсынды», – деп хабарлады министрліктің баспасөз қызметі.
Миландағы алғашқы сауда-экономикалық миссияға ауыл шаруашылығы, мұнай сервистік қызметтер, тоқыма өнеркәсібі, туризм және IT салалары бойынша 50-ден астам қазақстандық кәсіпорын қатысты. Бұл бастама қазақстандық өнімнің ЕО және Италия нарығына жылдам шығуын қамтамасыз ету, еуропалық сапа стандарттарына көшу үшін алдыңғы қатарлы тәжірибе орталықтарын («Excellence Center») құруға ықпал етпек. «Made in Italy» вице-министрі Валентино Валентини бұл идеяны қолдап, бірлескен жобалар екі елдегі шағын және орта бизнестің дамуын ынталандыратынын айтты.
2023 жылы Қазақстан мен Италия арасындағы тауар айналымы 7,8%-ға өсіп, 16,1 млрд долларды құрады. Қазақстан экспорты 14,8 млрд долларды, импорт – 1,2 млрд долларды құрады. 2024 жылдың 8 айында тауар айналымы 33%-ға өсіп, 13,8 млрд долларға жетті, ал қазақстандық экспорт 36%-ға өсті (12,9 млрд доллар).
