11 қазанда Берік Әбдіғалиұлы Қазақстан Республикасы Ұлттық музейі директорының міндетін уақытша атқарушы қызметіне тағайындалды. Бұл жөнінде Ұлттық музейдің баспасөз қызметі хабарлады.
ҚР Мәдениет және ақпарат министрінің міндетін атқарушы Айзада Құрманова музейге арнайы келіп, Берік Әбдіғалиұлын музей ұжымына таныстырды.
Бүгін Президент Қасым-Жомарт Тоқаев Ұлытау әкімі Берік Әбдіғалиұлын қызметінен босатты. Әлеуемттік желілер мен ғаламторда шенеуніктің идеология жұмыстарын жақсы атқаратыны, қоғамдық, танымдық шараларды жиі ұйымдастыратыны туралы жиі жазылады. Бұған дейін Ұлттық музейде «Қасиетті Қазақстан» ғылыми-зерттеу орталығын басқарған.
Өмірбаяны:
Берік Әбдіғалиұлы 1971 жылы туған. 1994 жылы әл-Фараби атындағы Қазақ Ұлттық университетін «Тарих және қоғамтану оқытушысы» мамандығы бойынша тәмамдаған.
Әр жылдары Президент жанындағы Қазақстанның стратегиялық зерттеулер институтында қызмет етті.
– 2010-2013 жылдары Ұлытау ауданы әкімі, Жезқазған қаласының әкімі, Арқалық қаласының әкімі, Қарағанды облысы әкімінің орынбасары;
– 2016 жылы ҚР Қорғаныс министрлігінің ҚР Қарулы күштері Әскери-тарихи музейінің бас ғылыми қызметкері;
– 2017-2019 жылдары ҚР Ұлттық музейінің «Қасиетті Қазақстан» ғылыми-зерттеу орталығының жетекшісі;
– 2019-2021 жылдары Қарағанды облысы Ұлытау ауданының әкімі.
– 2021-2022 жылдары ҚР Парламенті Мәжілісінің депутаты;
– 2022-2024 жылдары Ұлытау облысының әкімі лауазымын атқарған.
