Қазақстанның туризм және спорт министрлігі футболдан ұлттық құраманың бас бапкері Станислав Черчесовтің мемлекеттік тілге қатысты әзіліне жауап берді. Министрлік тиісті талап хатты федерацияға жолдаған.
Әлеуметтік желіде Черчесовке қазақ тілінде сұрақ қойған азаматқа бас бапкер: «Сен французша сөйлеп тұрсың ба?», – деп сөзін бөлген.
Министрлік осы бейнежазбаға байланысты федерацияға хат жолдап, Черчесовке мемлекеттік тілдің маңызын түсіндіруді талап еткен.
«Хатта мемлекеттік тілдің мәртебесі Қазақстан Республикасының Конституциясы мен «Тіл туралы» Заңына сәйкес жоғары тұратыны және оған барлық азаматтың құрмет көрсетуі керек екені айтылған», – делінген министрлік хабарламасында.
Министрлік бұл талапты барлық федерацияға қоятынын атап өтіп, елдегі ұлттық құндылықтарды орынсыз әзілге қосуға болмайтынын ескертті.
Айта кетейік, ресейлік бапкер Черчесов бұл лауазымға 2024 жылдың маусымында келген. Кейбір ақпарат көздері оның жалақысы 1,2 млн еуро деген ақпарат таратқан. Футбол федерациясы бұл ақпаратты жоққа шығарғанымен, бапкердің жалақысының көлемін жария етпеді.
