Қазақстан Шанхай ынтымақтастық ұйымы бюджетіне төлейтін жарнасын бекітті. Бұрын Қазақстан бұл ұйымға төлейтін үлес жарнасы 17,6 % еді. Енді 15,2% болды.
«2017 жылғы 1 желтоқсанындағы Шанхай ынтымақтастық ұйымының бюджетін қалыптастыру және орындау тәртібі туралы келісімге өзгерістер енгізу туралы хаттама жобасы мақұлдансын», – делінген Президент Қасым-Жомарт Тоқаевтың жарлығында.
ШЫҰ-ға мүше-мемлекеттердің үлес жарнасының көлемі мынадай:
Беларусь – 5,8%, Үндістан – 5,9%, Иран – 5,8%, Қазақстан – 15,2%, Қытай –17,6%, Қырғызстан – 7,6%, Пәкістан – 5,9%, Ресей – 17,6%, Тәжікстан – 6%. Өзбекстан – 12,6%.
Премьер-министр Олжас Бектеновке Қазақстан атынан хаттамаға қол қою тапсырылды. Сондай-ақ өзгерістер мен толықтыру енгізуге де рұқсат етілді. Бұл хаттама 2025 жылдың 1 қаңтарынан бастап уақытша қолданысқа енеді.
Мұның алдында Президент ШЫҰ-ның Еуразия құрлығында бейбітшілік пен қауіпсіздікті сақтаудағы ерекше орнын атап өткен еді.
