Boeing қозғалтқыштарын жеткізетін компанияның акциялары 9%-ға құлдырады

Boeing және Airbus ұшақтарына қозғалтқыштар жеткізетін GE Aerospace компаниясының акциялары сейсенбі, 22 қазан күні 9%-ға құлдырады. Бұл компанияның тоқсандық пайдасы сарапшылар күткендегіден де асып түскенімен және жылдық қаржылық болжамын жоғарылатқанымен байланысты. Компания ұшақ қозғалтқыштарын жеткізу 6%-ға азайғанын хабарлады. Алайда Barron’s басылымы акциялардың құлдырауының себебі инвесторлардың шамадан тыс жоғары үміттерінде екенін атап өтті. GE Aerospace акциялары жыл басынан бері 90%-дан астам өскен еді.

GE Aerospace – General Electric құрамында болған, биыл сәуірде үшке бөлінген компаниялардың бірі: GE Aerospace, энергетикалық GE Vernova және GE Healthcare.

GE Aerospace үшінші тоқсандық есебінде акцияға шаққандағы пайдасы 1,15 долларды, ал кірісі 9,6 млрд долларды құрағанын хабарлады. FactSet деректері бойынша, Уолл-стрит орташа есеппен акциядан 1,13 доллар пайда және 9 млрд доллар кіріс күтті. Жалпы Aerospace тапсырыстарының көлемі 12,6 млрд долларды құрады.

Тоқсан қорытындылары бойынша, компания 2024 жылға арналған операциялық пайда болжамын 6,5-6,8 млрд доллардан 6,7-6,9 млрд долларға дейін жақсартты. Сондай-ақ акцияға шаққандағы пайда бұрын күтілгендей 3,95-4,2 доллар емес, 4,2-4,35 доллар болады деп болжануда. Бұл көрсеткіштер Уолл-стрит күткеннен сәл жоғары.

Jefferies сарапшысы Шейла Кахьяоғлу GE Aerospace акцияларын 220 долларлық мақсатпен сатып алуды ұсынған болатын. Ол компанияның тоқсандық есебін «берік, бірақ мінсіз емес» деп сипаттады. Себебі қорғаныс тапсырыстарының тиімділігі 9,8%-ды құрап, өткен жылмен салыстырғанда 2,4 пайыздық тармаққа төмендеген.

Сонымен қатар компания есеп беру кезеңінде 737 MAX және A321 ұшақтарында қолданылатын 365 LEAP қозғалтқышын жеткізгенін хабарлады. Бұл 2023 жылдың үшінші тоқсанымен салыстырғанда шамамен 6%-ға аз. Компания Boeing қызметкерлерінің бір айдан астам уақытқа созылған ереуілі өндірістегі мәселелерге себеп болғанын жоққа шығарды. GE Aerospace бас директоры Ларри Калп «Біз жұмысты әдеттегідей жалғастырдық»,  – деді. Бірақ ереуілдің ұзаққа созылуы жеткізушілерге көбірек қиындықтар туғызатынын мойындады.

Barron’s атап өткендей, әуе құрастыру саласына бөлшектер жеткізетін өндірушілер, әдетте, жаңа ұшақтардың компоненттерінен гөрі қосалқы бөлшектер мен кейінгі қызмет көрсету арқылы көбірек табыс табады.

Vertical Research Partners сарапшысы Роб Сталлард GE Aerospace акцияларын 196 долларлық мақсатпен сатып алуды ұсынды және компанияның есебін «жақсы» деп бағалап, инвесторлардың күтуі «өте жоғары» болғанын растады.

MarketWatch мәліметі бойынша, GE Aerospace акцияларын бақылайтын 19 сарапшының барлығы дерлік оларды сатып алуды ұсынады, ал тек бір сарапшы бұрын сатып алынған акцияларды сақтауға кеңес береді. Сатуға қатысты ұсыныс жоқ. Уолл-стриттің консенсус бағасы – 209,5 доллар, бұл 18,6%-ға өсу мүмкіндігі бар екенін білдіреді.