Qazaq Banki акционері Бақыт Ибрагимді өз-өзіне қол жұмсауға мәжбүрлеуі мүмкін делінген қылмыстық іс жабылды
Алматының экс-басшысы Бақытжан Сағынтаевтың бұрынғы күйеу баласы, Qazaq Banki акционері Ибрагимнің суицид жасауына ешкім кінәлі емес. Осындай қорытындыға келген тергеушілер айғақ таппай, істі жауып тастады. Бұл туралы KursivMedia-ға Алматы полициясы хабарлады.
«Жүргізілген жедел-іздестіру шаралары кешенінің нәтижелері бойынша Қазақстан Республикасы Қылмыстық кодексінің 35-бабы 1-бөлігі 2-тармағының негізінде қылмыстық іс тоқтатылды», – делінген хабарламада.
Ведомство бұл шешімді Алматы қаласы Алмалы ауданының прокуратурасы бекіткенін баса айтты.
Қылмыстық кодекстің бабына сай құрамында «қылмыстық құқық бұзушылықтың болмауына байланысты» іс қысқартылды деп көрсетілген.
Ибрагим 2018 жылы Германиядан экстрадицияланып, Bank RBK-дан ақша жымқырғаны үшін сегіз жылға бас бостандығынан айырылды. Ол 2024 жылдың басында босатылды. Оған үкім шығарылғанға дейін (бір жарым тәулік) тергеу изоляторында өткізген уақыты есептелді.
Алайда наурыз айында Алматы полиция департаменті кәсіпкер Бақыт Ибрагимнің қайтыс болғанын растады. Одан кейін «Өзін-өзі өлтіруге итермелеу» бабы бойынша іс қозғалды.
