Ticketоn сайты әдеттегідей соңғы аптада ең көп касса жинаған фильмдер тізімін жариялады. Прокаттен түскен ақшасы бойынша отандық фильм «Кеттік бәрін таста» бірінші орынға шығып, голливудтық «Веномды» артта қалдырды.
Апта бойынша ең көп касса жинаған фильмдер тізімі төмендегідей:
1. «Кеттік бәрін таста» – 572 548 372 теңге
Отандық киноиндустрияның бұл жаңа туындысы алғашқы аптада-ақ көрермендер арасында қызу талқыға түсті.
«Кеттік бәрін таста» фильмі Қаныбек пен Қайролла туралы. Екі дос танымал актер болуды армандайды. Атақ пен мансап жолында Қаныбек пен Қайролла күтпеген сынақтарға тап болады — олар Ташкентке жергілікті продюсерлермен жұмыс істейміз деп барып, құлдыққа түсіп қалады,
Әлеуметтік желіде бұл киноға барғандар арасында сыни пікірлер жазып жатқандар көп. Солардың бірі Асхат Қасенғали Facebook парақшасында пікір қалдырды.
«Қаржы мен уақыт, ал ең бастысы жүйке құртқым келмесе, бармай-ақ қойғаным дұрыс деген ұйғарымға келдім.
«Қазақ тілін қолдау» деген қазақша түсірілген кез келген өнімді жұта беру деген сөз емес-ау. Сапасыз қазақ тілінде түсірілген фильмдерге барудың қажеті жоқ. Оданда қазақ тіліне сапалы дубляждалған өнімдерге барыңыз. Бұл да тілді қолдаудың бір көрінісі. «Веном-3. Соңғы би» фильміне барып көрдім. Аудармасы жақсы шығыпты» деп жазды Асхат.
2. «Веном: Соңғы би» – 463 191 846 теңге
Өткен аптада 800 млн теңгеден астам табыс тапқан «Веном: Соңғы би» фильмі алдыңғы аптамен салыстырғанда екі есе төмендеген. Әйгілі комикс экранизациясы бастапқыда көш бастап келгенімен, бұл аптада екінші орынға сырғыды. Танымал актер Том Харди «Веном» фильмінің соңғы бөлімінде өзінің әйгілі рөліне оралады. Бұл бөлімде Эдди мен Веномның бір-біріне қарсы күресуі жер бетінде ғана емес, өзге әлемдерде де болмақ. Марвел кейіпкерлерін сүйетін жанкүйерлер енді бұл туындыны қазақ тілінде көре алады.
3. «Заманback» – 273 96 146 теңге
Әрі комедияға, әрі драмаға толы «Заманback» фильмі де көрермендердің қызығушылығын тудырды. Аталған туындының шыққанына үш апта болсада ең көп касса жинаған кинолар арасында үздік үштіктен түспей келеді. «Заманback» – өткен күнге қарап, болашақ жайлы ойландыратын әсерлі оқиғаға негізделген туынды.
4. «Жабайы робот» – 185 449 329 теңге
Ерекше сюжетімен танымал бұл мультфильм төртінші орында тұр. Қазақ тіліне дубляждалған тағы бір туынды «Жабайы робот» көрермендерді шытырман оқиғалар мен ғажайыптар әлеміне қызықты саяхатқа апарады. Бұл мультфильм көрерменге достықтың, эмпатияның маңызын және шынайы бақыт адамның өзін және айналасын қабылдауда екенін еске салады.
5. «Сәлем сосед» – 40 112 020 теңге
Комедия жанрындағы бұл туындының шыққанына бір апта ғана болсада, бесінші орынға жайғасты. Қазақстандық фильмдердің осындай бәсекеге түсуі және рейтиңдерде жоғары орындарға көтерілуі қазақ киноиндустриясының дамып келе жатқанын көрсетсе керек.
Еске сала кетейік, 2023 жылы ең көп касса жинаған отандық «Таптым-ау сені» киносы, атақты голливудттық «Аватар: Су жолы» фильмін басып озған
