14 қараша күні Алматы қаласында Ұлттар лигасы аясында өтетін Қазақстан мен Аустрия матчына билеттер сатылымға шықты, деп хабарлайды Қазақстан футбол федерациясы.
Ticketon билет операторының мәліметінше ең арзан билеттің құны 3000 теңгеден басталады. Ал, ең қымбат билет 12000 теңге. Сондай-ақ, орындарға байланысты 5000-8000 аралығындағы билеттер де бар.
Бұған дейінгі ойындарда Қазақстан футбол федерациясы мен Ticketon билет операторымен бірлесіп ұлттық құраманың ойындарына «атаулы» билеттерді енгізген еді. Яғни, билетті сайттан сатып аларда, аты-жөңінізді енгізіп, матч күні жеке күәлік бойынша растау керек болады.
Федерацияның мәліметінше, бұндай өзгеріс келеңсіз жағдай мен алыпсатарлардан сақ болу үшін жасалынды.
«Билеттер тек онлайн сатылады. Билетті алып-сатарлардан сатып алмауларыңызды сұраймыз», делінген хабарламада.
Еске сала кетейік, Қазақстан мен Аустрия арасындағы ойын 14 қараша күні Алматының орталық стадионында сағат 20:00 де өтеді.
Қазақстан құрамасы Ұлттар лигасы аясында осыған дейін, төрт ойын өткізді. Үшеуінде жеңіліс тауып, бір ойын тең нәтижемен аяқталған еді. Ал, Алматыда соңғы болған ойында Словенияға қарсы ұтылып, ұлттық құраманың бас бапкері Станислав Черчесов қазақ тіліне қатысты дауға қалған еді. Артынша, федерация ресми мәлімдеме жасап, бас бапкерге айыппұл салынғанын хабарлады.
