«Антирекорд орнатқан бас бапкердің айлығы құпия»: сенатор прокуратура мен антикордан футбол федерациясын тексеруін сұрады

Сенат депутаты Дархан Қыдырәлі 7 қарашада қазақстандық футболдағы бірқатар мәселелерді көтерді. Сенатордың айтуынша, отандық клубтардың қаржыландыруы мен шетелдік ойыншылардың жалақысы туралы ақпараттың жоқ болуы және кейбір матчтарда төрешілердің даулы шешімдері футболды басқару саласында ашықтықтың жоқтығын көрсетеді.

Дархан Қыдырәлінің айтуынша, 4 ойында 8 гол жіберіп, бірде-бір гол салмай антирекорд орнатқан ұлттық құрама бас бапкерінің жалақысы кейбір еуропалық топ клубтарының бапкерлерінен кем емес. Алайда, бұл мәліметтің жалпы жұртшылық үшін ашық емес екенін атап өтті. Сол сияқты, жергілікті бюджет есебінен қаржыландырылатын клубтардағы шетелдік ойыншылардың жалақысы туралы ақпарат та қолжетімсіз.

«Көптеген елдерде футболға қатысты арнайы заң бар. Осы саладағы мәселелерді шешудің бір жолы ретінде Қазақстанда да футбол туралы арнайы заң қабылдау қажет деп есептеймін. Бұл заң барлық клубтар мен спорт ұйымдары үшін бірыңғай ережелерді енгізуге және осы саланы реттеуге мүмкіндік берер еді», – деді Қыдырәлі.

Сондай-ақ, Қыдырәлі жақында өткен «Атырау» мен «Астана» арасындағы матчтардағы төрешілердің шешімдері халық арасында наразылық тудырғанын атап өтті. Алайда, бұл шешімдер бойынша нақты шаралар қабылданбағаны ұлттық чемпионаттың әділдігіне күмән тудыратынын жеткізді.

Қазақстан Футбол федерациясы қазақстандық төрешілер мен бапкерлердің біліктілігін арттыруға ерекше көңіл бөлуі керектігін айтты. Бүгінде елдегі 155 төрешінің дайындығы талапқа сай келмейтінін, Қазақстанның әлемдік турнирлерге өз төрешілерін шығара алмай отырғанын жеткізіп, бұл жағдай олардың біліктілігін арттыру қажеттігін көрсететінін айтты.

«Грузия мен Өзбекстан сияқты елдердің тәжірибесіне назар аударуымыз керек. Бұл елдер балалар спорты мен инфрақұрылымға жүйелі қолдау көрсету арқылы футбол деңгейін көтерді. Қазақстан да ауылдық өңірлердегі балалар футбол мектептері үшін жағдай жасауға басымдық беруі қажет, себебі онда тіпті минималды инфрақұрылым жоқ», – деді сенатор.

Қыдырәлінің айтуынша, отандық футболдың дамуына жол ашу үшін жүйелі қолдауды күшейтіп, ашықтықты қамтамасыз ету маңызды. Тек осы жағдайда ғана ұлттық футбол жаңа деңгейге көтеріліп, халықаралық аренада табысқа жету мүмкіндігі артады.

Еске сала кетейік, футбол мәселесін кеше 6 қарашада мәжілісте де көтерді. Депутат Қазыбек Иса Қазақстандағы футбол клубтарын жекешелендіруді ұсынды.