Nissan акциялары сейсенбі күні кейінгі 15 жылдағы ең жоғары қарқынмен өсті. Бұған белгілі инвесткомпанияның қиындыққа ұшыраған жапон автоконцерні акцияларының бір бөлігін сатып алғаны себеп болды.
Nissan акциялары Токиодағы саудада 20,6%-ға дейін өсті. Кейінірек өсім 13%-ға дейін баяулады. Мұндай өзгеріс автоконцерн реттеуші органдарға жаңа акционер туралы құжат тапсырғаннан кейін басталды.
Nissan акцияларының 2,5%-ын сингапурлық Effissimo Capital Management хедж-қорымен аффилиирленген ECM Master Fund қорының сенімді басқарушысы Suntera (Cayman) Ltd. сатып алған.
Bloomberg мәліметіне сәйкес, Suntera және Effissimo компаниялары – Жапониядағы активистік инвестициялардың әкесі Ёсиаки Муракамидің шәкірттері негізін қалаған ұйымдар. Аталған екі компания 2021 жылы жапон корпоративтік әлемінің бұрынғы көшбасшысы Toshiba-ны сату мәселесінде танымал болған-ды.
«Автоконцернді құрылымдық реформаларды іске асырып, бизнесті дағдарыстан шығару мүмкіндігі туралы сыбыстардан кейін инвесторлардың Nissan-ға деген қызығушылығы артты. Тиісінше, бұл жағдай акциялардың өсуіне түрткі болды», – дейді Aizawa Securities қор басқарушысы Икуо Митсуи.
FactSet консенсус рейтингі бойынша Nissan акцияларына деген көзқарас әр алуан: 14 аналитиктің жетеуі акцияларды ұстауға кеңес береді. Екі аналитик сатып алуды (рейтинг – Buy), бесеуі сатуды (Underweight және Sell) ұсынып отыр.
Өткен аптада Nissan акциялары компанияның сату болжамын төмендетіп, ауқымды қысқартулар мен өндірістік қуаттың 20%-ын жабу туралы жариялағаннан кейін 2020 жылдан бергі ең төмен деңгейге түскен еді. Компания Қытайда арзан электрмобильдер мен гибридтерді шығаратын жергілікті өндірушілерге есе жіберіп жатыр. АҚШ-та да өз позициясын жоғалтып алған сыңайлы. Nissan америкалық нарықта гибридтерді сатудан бас тартқан болатын. Бірақ олардың танымалдығы күтпеген жерден артып кетті.
