АҚШ-тағы президент сайлауында Дональд Трамптың жеңісі долларды күшейтіп, дамушы елдердің валюталарын, соның ішінде теңге әлсіретті. Теңге бағамының күрт өзгеруіне жол бермеу үшін Ұлттық Банк жедел әрекет етіп, валюталық интервенция жүргізуге дайын. Бұл туралы Ұлттық банк төрағасының орынбасары Әлия Молдабекова мәлімдеді.
Негізгі әлемдік валюталарға шаққандағы доллар бағамын көрсететін DXY индексі қыркүйек айының соңында 100,8 тармақта төмен мәнге жеткеннен кейін 5%-ға дейін нығайып, 105,5 тармаққа дейін өсті. ЕМ валюталарының индексі қыркүйек айының соңынан 4,2%-ға төмендеді (11 қарашадағы жағдай бойынша), деді Молдабекова.
Сонымен қатар, Ұлттық банк төрағасының орынбасарының айтуынша, теңгеге мұнай бағасының арзандауы да ықпал етті. Қара алтынның 1 баррелі 75 доллардан 71-ге дейін түсті. 2024 жылғы қарашаның басынан бері ұлттық валютаның биржалық сауда-саттықтағы бағамы 1,4%-ға әлсіреп, 1 АҚШ доллары үшін 495 теңгеге жетті.
Өкінішке қарай, спекулятивтік сипаттағы мәмілелердің көбейгені де байқалып отыр. Бұл да айырбас бағамын тым құбылтып жібереді. Негізі Ұлттық Банк валюта бағамына тән өзгерістерге мән бере қоймайды. Өйткені мұның барлығы фундаменталды факторлармен дәйектелген. Алайда, соңғы күндердегі теңгенің құбылуын шамадан тыс деп бағалаймыз», – деді Молдабекова.
Осылайша теңгенің күрт өзгеруіне жол бермеу үшін Ұлттық Банк жедел әрекет етіп, интервенция жүргізуге дайын отыр.
