Қазақстанда «Сапалы өнім» жобасы аясында жүргізілген ауқымды зерттеу нәтижелері 60%-дан астам өнімнің белгіленген нормаларға сай еместігін көрсетті. Бұл туралы Сауда және интеграция министрлігі хабарлады.
Әдемі жапсырмалардың артында не жасырылған?
«Сапалы өнім» жобасы тұтынушылардың құқықтарын қорғау және азық-түлік қауіпсіздігін қамтамасыз ету мақсатында басталған еді. Жобаның аясында қоғамдық ұйымдар Қазақстанның әртүрлі аймақтарында азық-түлік өнімдерін тексерді. Зерттеу барысында сарапшылар дүкендерден өнімдерді сатып алып, аккредиттелген зертханаларда талдаудан өткізді.
Зерттеу 1423 түрлі азық-түлік және тұрмыстық химия өнімін қамтыды. Нәтижелері алаңдатарлық: 69%-ында бұзушылықтар анықталды.
Ең көп кездескен кемшіліктер мыналар болды:
Маркировка: 83%-дан астам өнімде белгілеу талаптарына сай келмеу байқалды. Көп жағдайда құрам, өндіруші, жарамдылық мерзімі туралы ақпарат жоқ немесе мемлекеттік тілде жазылмаған.
Санитарлық нормалар: Үлгілердің 17%-ы санитарлық-эпидемиологиялық талаптарға сай келмеді, бұл өнімдерде денсаулыққа зиянды заттар, бактериялар немесе қауіпті микроағзалар болуы мүмкін екенін білдіреді.
Әкімшілік жауапкершілік: 224 кәсіпкерлік субъектісіне әкімшілік шаралар қолданылды.
Сату тыйымы: 43 түрлі өнімнің сәйкестік декларациясы жойылды немесе уақытша тоқтатылды, яғни олардың Қазақстан аумағында сатылуына тыйым салынды.
Азық-түлік өнімдерінің 69%-ында заң бұзушылықтардың анықталуы жағдайдың күрделілігін айқындайды. Әсіресе, сүт өнімдеріне қатысты мәселе ерекше алаңдаушылық туғызады. Йогурттар мен айрандардың 70%-ында консерванттардың шамадан тыс мөлшері табылған, бұл балалар мен аллергиясы бар адамдар үшін қауіпті болуы мүмкін.
Тұтынушыларға не істеу керек?
Бұл жағдайда әрбір тұтынушы сақ болу керек. Өнімдерді таңдауда келесі аспектілерге назар аударыңыз:
Құрамы: Жапсырманы мұқият оқып, әртүрлі өнімдерді салыстырыңыз.
Жарамдылық мерзімі: Өндірілген күні мен жарамдылық мерзімін тексеріңіз.
Өндіруші: Сенімді өндірушілердің өнімдерін таңдаңыз.
Сыртқы түрі: Қаптаманың тұтастығына назар аударыңыз.
Баға: Тым төмен бағаның соңынан түспеңіз, сапалы өнімдер қымбатырақ тұрады.
Сондай-ақ, Тұтынушылардың құқықтарын қорғау комитеті халықты қырағы болуға шақырады
«Сапасыз өнімді тапсаңыз, үнсіз қалмаңыз. Тиісті органдарға шағымдануды ұмытпаңыз. Тек бірігіп әрекет ету арқылы ғана сөрелерімізде қауіпсіз әрі сапалы өнімдердің болуын қамтамасыз ете аламыз» делінген хабарламада.
