Kursiv.kz апта сайынғы топтама айдарын жалғастырады. Бүгінгі материалымызда да алдағы аптада болатын ең қызық, ең ерекше іс-шаралар жайлы деректерді жинадық. Бұл жетіде көбіне жанкүйерлердің жүрегіне әлдеқашан жол тауып қойған аңызға айналғандар ән кешін өткізеді екен. Сол концерттер мен өзге де іс-шара жайлы толығырақ төменнен оқыңыз.
Jigitter тобының ән кеші: 20 қараша, Семей қаласы
Поп жанрындағы шығармаларды орындайтын музыкалық вокалдық квартет, көптеген танымал әннің орындаушылары Jigitter тобы Семейге жол тартты. Құрамын жұрт жатқа танитын «Жігіттер» 20 жылдан астам Қазақстанның түкпір-түкпірінде гастрольдік сапар беріп, халықтың көңілін тауып, өнер көрсетіп келеді. Төрт жігіттен құралған бұл ұжым елдегі ең ұзақ және ең табысты шығармашылық одақтардың бірі болып саналады. Бүгінде қазақ эстрадасының көгінде жұлдыздары жарқырап, көпшіліктің көзайымына айналған «Жігіттер» квартеті өнер әлемінде өз орнын тауып, xалықтың үлкен қошеметіне бөленіп, көпшіліктің сүйіктісіне айналған.
Айдар Байжанов, Бағлан Әбдірайымов, Ердос Қанаев және Мырзахан Махановтан құралған топтың репертуарында төрт үнтаспа, 10-ға жуық бейнебаян, 80-ге жуық ән бар. Ал олардың 2000 жылдардың басында түсірілген «Ерке қыз» , «Арман-ай» бейнебаяндары әлі жұрт жадында. Олардың «Ақ босаға» әні қосылмастан әлі күнге бірде-бір той өтпейді. Бұл жаңадан отау көтерген барлық ғашықтың гимніне айналған ән деуге де болады.
«Жігіттер» тобы қалың көрермені үшін тағы гастрольдетіп жұр. Алдағы аптада, 20 қараша күні, шығармашылық ұжым Семей халқы үшін ән шырқайды.
Кеш қаладағы Семей мәдениет үйінде өтеді. Басталуы сағат 19:00-де. Билеттерді Ticketon.kz сайтынан таба аласыз.
«ЯШЛЫК» ансамблінің мерейтойлық концерті: 22-23 қараша, Алматы қаласы
Аты аңызға айналған «Яшлык» вокалдық-аспаптық ансамблінің 50 жылдығына арналған ауқымды мерейтойлық концерт қонағы болыңыз. Бұл – алдағы аптада өтетін басты музыкалық іс-шаралардың бірі. Осынау айтулы іс-шараға ансамбльдің алтын хиттері мен концерт қонақтарын біріктіретін мерекелік бағдарлама әзірленген. Бұл күні сахна төрінде «Яшлык» ансамблімен бірге ұмытылмас атмосфера қалыптастыру үшін, көрермен үшін өзге танымал орындаушылар өнер көрсетеді. Кеш қонақтары қатарында Дос-Мұқасан, Роза Рымбаева, Ділназ Ахмадиева, Әлішер Каримов, Парвиз Назаров және өзге де қазақ және ұйғыр эстрадасының жұлдыздары бар.
Ансамбльдің жұлдызды құрамында халықтың сүйіктісіне айналған Мұрат Ахмадиев (вокал, жетекші), Кахарман Именов (гитара, вокал), Марат Маметбакиев (вокал), Ялкунжан Шамиев (гитара, вокал), Гүлбахар Ахмадиева (вокал), Кутлук Геняков (пернелер, вокал), Ильгиз Батыршин (соло гитара), Пайзуллам Иминов (халық аспаптары), Саутжан Сонуров (халық аспаптары, миниатюралар), Сайдалим Амутов (халық аспаптары, миниатюралар) өнер көрсетеді.
1974 жылы Алматыда құрылған «Яшлык» вокалдық-аспаптық ансамблі Қазақстанның музыкалық мәдениетіндегі тұтас бір дәуірмен тең. Мұрат Әбдірайымұлы Ахмадиевтің басшылығымен ансамбль КСРО төңіерегінде де, одан тыс жерлерде де мыңдаған тыңдарман жүрегін жаулап алды. Бірегей дыбыс, халық аспаптары мен заманауи аранжировкалардың шебер үйлесімі «Яшлык» тобын эстрада әртістерінің бүкілодақтық байқауы (Ленинград, 1978), саяси ән байқауы (Ереван, 1979), Дүниежүзілік жастар мен студенттер фестивалі (Мәскеу, 1985) және басқа да көптеген беделді байқаулардың лауреаттары етті.
Концерт 22-23 қараша күндері Алматыдағы Республика сарайы ғимаратында өтеді. Басталуы сағат 19:30-да. Билеттерді Ticketon.kz сайтынан таба аласыз.
Orda тобының концерті: 24 қараша, Астана қаласы
Тарихы сонау 2000-шы жылдардан бастау алатын «Орда» тобы жылдар өтсе де, тыңдарманының көңілінен кеткен емес. Бұл топтың әнін түрлі буын өкілі жатқа біледі, караоке залында ең жиі шырқалатын әндер тізімін де «Орда» тобының әндері бастап тұрады. Жасы да, кәрісі топтың әнін естісе қосыла шырқап, ырғағына ілесіп, тербеле жөнеледі. Заманының жаңалығы болған топ әлі күнге ел аузында.
Топ құрылған күннен-ақ көрермен ықыласына бөленді. Әуелде Бауыржан шоу әзіл-сықақ театры сахнасына шыққан ағайынды Оразбековтер мен ағайынды Беделхандар уақыт өте «Орда» болып, сол кездегі топ чарттарда алдына жан салмады.
Алғашқы жылдары шыққан «Қилы Заман» әні «платина» дәрежесін иеленіп, 50 апта бойы «Европа Плюс КЗ» радиосының ротациясында 1-ші орында болды.
Топтың концерттерін, сахнаға шыққанын қазір де тыңдарман асыға күтеді. Жиі концерт бермесе де, жұлдыздар залды жылдам жинайды. Сол үшін де Астанада болатын концертке билет алып үлгеруге асығуға кеңес береміз.
Концерт Qazaqconcert концерт залында өтеді. Басталуы сағат 19:00-де. Билеттерді Ticketon.kz сайтынан таба аласыз
«Барыс» хоккей клубының матчтары: 20, 22, 24 қараша, Астана қаласы
Алдағы аптада, 20, 22, 24 қараша күндері астаналық «Барыс» хоккей клубы матчтары өтеді. Хоккей, спорттық жарыстарды көргенді ұнататындар немесе кешін қызықты өткізгісі келген кез келген адам осы доданы көруге бара алады. Бұған дейін хоккей ойындары қалай өтетінін білмесеңіз де, жаңа нәрсені көріп, жаңа эмоция сезінгіңіз келсе де, хоккей көруге кеңес береміз.
«Барыс» – Астана қаласының кәсіпқой хоккей клубы. Барыс Құрлықтық хоккей лигасының (ҚХЛ) Чернышев дивизионының мүшесі. «Барыс» клубы 1999 жылы құрылып, 2001-2002 жылғы маусымнан ойнай бастады.
Кейінгі жылдары «Барыс» ірі халықаралық турнирлерге қатысатын Қазақстанның ерлер, студенттік, жасөспірімдер және жасөспірімдер құрамаларын жасақтайтын базалық клуб болды.
Ашылған уақыттан бері мектеп әртүрлі командаларда ойнайтын 70-тен астам кәсіби спортшы тәрбиелеп шығарды. Қазіргі таңда «Барыс» спорт мектебіне 800-ге жуық бала тартылса, олардың әрқайсысы өз өмірін хоккеймен байланыстыруды ұйғарған.
Алдағы жарысқа билеттерді Ticketon.kz сайтынан сатып ала аласыз. Матчтар «Барыс аренада» өтеді.
Ratovich and Live Band 24 қараша, Атырау қаласы
Алдағы аптада Ақжайық тұрғындары ерекше музыка тыңдап, кешті керемет өткізе алады. Себебі қалаға белгілі пианист – Темірлан Бейсенбай барып, Live Band сүйемелдеуімен концерт қойып бермек. Әлеуметтік желіде Ratovich атымен белгілі Темірлан кейінгі жылдары сапалы музыка сүйер қауым арасында кеңінен танылып үлгерді.
Атыраудағы кеш бағдарламасы Ратовичтің жылдар бойы сан алуан концертінде шырқалған үздік туындыларынан тұрады. Билет алып, тамаша кештің куәсі болыңыз!
Концерт Атырау қаласындағы Махамбет атындағы Қазақ драма театрында өтеді. Билеттерді Ticketon.kz сайтынан таба аласыз.
