Шымбұлақ тау-шаңғы курортының жаңа маусымы техникалық ашылуын 23 қарашада бастайды. Бұл туралы курорттың ресми Telegram-каналында жарияланды.
Тау-шаңғы курортының мәлімдеуінше, алғашқы кезеңде қонақтар үшін келесі трассалар ашылады: Сол Талғар трассасы, «Комби-2» арқылы Талғар трассасы, Балаларға арналған «Ақ аю» және «Жылан» трассалары.
Алайда толыққанды ашылу желтоқсан айына жоспарланған, өйткені барлық трассаларды дайындау үшін қалың қар мен қосымша уақыт қажет. Сонымен қатар, түнгі сырғанау да желтоқсан айына қарай басталады.
Канат жолдарының жұмыс уақыты:
Медеу – Шымбұлақ: 08:30-18:00,
«Комби-1»: 09:00-17:00,
«Комби-2»: 09:00-16:30,
Сол Талғар: 09:30-15:30,
ККД-4: 09:30-17:30.
Шымбұлақтың толық ашылуы мен түнгі сырғанау маусымының басталуына қатысты ақпарат желтоқсан айында қосымша жарияланатын болады.
Еске сала кетейік, 2 қарашадан бастап «Медеу» биік таулы мұз айдынында жаппай сырғанау маусымы ашылды. Спорттық нысандар дирекциясы кезектің алдын алу үшін билеттерді алдын ала Медеудің ресми сайты арқылы сатып алуға кеңес береді.
Сонымен қатар, «Шымбұлақ» тау-шаңғы курорты Ski Business Awards-2024 нұсқасы бойынша «ТМД елдерінің үздік тау-шаңғы курорты» атағына ие болған еді.
