«Әл-Наср» клубының жұлдызды шабуылшысы, әйгілі португал футболшысы Криштиану Роналду жақында YouTube арнасындағы жаңа қонағы туралы мәлімдеме жасап, жанкүйерлерін қызықтырып қойған еді.
Көпшілік бұл футбол әлеміне қатысты танымал тұлға болады деп күтті. Алайда Роналдудың арнасында белгілі блогер MrBeast қонақ болатыны белгілі болды.
MrBeast шын есімі Джимми Дональдсон — америкалық бизнесмен және филантроп, қазіргі таңда YouTube платформасында ең ықпалды тұлғалардың бірі саналады. Оның арнасында 331 миллион жазылушы бар, ал видеолары жүздеген миллион қаралым жинайды. Кейбір роликтерінің қаралымы жарты миллиард.
Роналду мен MrBeast тікелей эфирге, бүгін, 21 қараша күні астаналық уақыт бойынша сағат 19:00-де шығады.
Еске сала кетейік, бұған дейін Криштиану Роналду өз YouTube арнасын ашып, бір тәуліктің ішінде 19 млн оқырман жинап, рекорд орнатты. Сондай-ақ футболшы MrBeast-пен жарысып, жазылушыларының саны бойынша басып озу мақсатын қойған еді.
Айта кетейік, Роналду Instagram әлеуметтік желісінде оқырманы ең көп адам. Instagram-да оның 600 миллионнан астам оқырманы бар. Сондай-ақ 39 жастағы Роналду – «Алтын доптың» бес дүркін иегері, Чемпиондар Лигасының бес дүркін жеңімпазы, Еуропа чемпионы, Ұлттар Лигасының жеңімпазы. 2022 жылдың желтоқсанында ол Сауд Арабиясының «Әл-Насрымен» келісімшартқа отырды.
