Қазақстан Ресейден мұнай өнімдерін импорттау үшін екі ел арасындағы келісім мерзімін ұзартпақшы
Қазақстан мен Ресей мұнай жеткізу туралы келісімді жаңартады. Бұл туралы «Ашық НҚА» порталына орналастырылған Энергетика министрлігінің құжатында жазылған.
«2010 жылғы 9 желтоқсандағы Қазақстан Республикасының Үкіметі мен Ресей Федерациясының Үкіметі арасындағы Қазақстан Республикасына мұнай және мұнай өнімдерін жеткізу саласындағы сауда-экономикалық ынтымақтастық туралы келісімінің қолданылуын қайта бастау және оған өзгерістер енгізу көзделеді»,- делінген құжатта.
Келісімге сәйкес мұнай және мұнай өнімдерін Қазақстанға жеткізу жөніндегі сауда-экономикалық ынтымақтастық туралы Келісімнің қолданылу мерзімі ұзартылмақшы. Бұл мерзімді 2024 жылдың 1 қаңтарынан 2028 жылдың 1 қаңтарына дейін созу көзделген.
Сонымен бірге келісім аясында 2024 жылы Қазақстан Республикасы мен Ресей Федерациясының энергетика министрліктері мұнай өнімдерін индикативтік теңгерім шеңберінде:
- автобензиндер – 285 мың тонна;
- авиаотын – 300 мың тонна;
- дизель отыны – 450 мың тонна;
- битум тұтынудың ең жоғары кезеңдерінде – 500 мың тонна көлемінде импорттауды көздеп отыр.
