Алматыда ауласында кішкентай баланы көлік қағып, қайтыс болғаннан кейін «Асыл арман» тұрғын үй кешенінің тұрғындары көшеге шығып, әкімдікке бірнеше талап қойды.
Іргелі ауылында оқушыларды тасымалдайтын көлік артқа жүріп келе жатқанда мектеп оқушысы дөңгелектің астында қалған. Оқиғадан кейін «Асыл арман» тұрғын үй кешенінің тұрғындары жиналып, әкімдікке қарсылық білдірді.
Тұрғындардың айтуынша, олар осы кешенге көшіп келген кезден бастап, он жыл бойы мектеп салуға өтініш жасап келген. Бірақ шенеуніктер тек уәде беріп келген. Балалар жақын маңдағы ауылдардағы мектепке баруға мәжбүр болған.
Қайтыс болған оқушы көпбалалы отбасының үлкен ұлы болған. Бірнеше күннен кейін 9 жасқа келуі керек еді.
«Балалар автобусқа отыруға асығады. Ол 50 оқушыны ғана тасымалдайды. Тұрғын үй кешенінде 20 мың адам тұрады. Он жыл бойы мектеп салуды сұрадық, бірақ еститініміз уәде ғана. Бұл шенеуніктердің жауапсыздығынан болған оқиға. Балалар көрші ауылдағы мектепке барады. Бүгінгі трагедияға кім жауап береді? Билік уәдені орындауы керек. Халықтың талаптарын елемеу – қылмыс!», – дейді тұрғындар әлеуметтік желіде тараған бейнежазбаларда.
Қарасай ауданы әкімдігі бірнеше жыл бұрын аймақта 2 мың орындық мектеп салуға уәде берген. Алайда қаржыландыру мәселесі шешілмегеннен кейін жұмыс тоқтаған.
Айта кетейік, қайғылы оқиға 27 қараша күні тұрғын кешенінің ауласында болған. Оқушыларды тасымалдайтын шағын автобус сегіз жасар баланы қағып кетіп, оқушы сол орында жан тапсырған.
