28 қарашадан бастап Алматыда «Экологиядағы инклюзия – жаңажылдық ғажайып» жобасы басталды деп хабарлайды қала әкімдігі. Акция аясында кез келген тұрғын ерекше қажеттіліктері бар балалар жасаған шырша ойыншықтары мен кеңселер мен басқа да мекемелерге арналған әшекейлерді сатып ала алады. Әшекейлер қайта өңделген пластиктен жасалып, эко шеберлермен өткізілген шығармашылық шеберлік сабақтарында балалардың қолымен жасалынады.
Жобаға жеке тұлғалармен қатар, қала ұйымдары да қатыса алады. Компаниялар өз қызметкерлеріне челлендж ұйымдастырып, әрқайсысы бір немесе бірнеше шырша ойыншықтарын сатып алуды ұсына алады. Эко-хаб қажетті материалдарды дайындап, серіктес реабилитациялық орталықтарға жібереді немесе балаларға тікелей өзі жеткізеді. Балалар эко шеберлердің көмегімен шырша әшекейлерін жасап, оларды кейін компаниялар өз кеңселерін, дүкен витриналарын, мейрамханалар мен қалалық шыршаларды безендіруге пайдалана алады. Әшекейлердің бір бөлігі балалардың реабилитациялық орталықтарын безендіру үшін қалдырылуы мүмкін.
Жоба бастамашысы Евгений Мұхамеджанов бұл идеяның кездейсоқ пайда болмағанын айтады:
«Біздің шеберлік сабақтарына ерекше қажеттіліктері бар балалар келеді. Олар ойыншықтарды ерекше ықыласпен жасайды. Біз олардың осындай ортада өздерін қажет және маңызды сезінетінін байқадық. Сондықтан олардың еңбегі қоғам тарапынан бағаланса деп шештік. Егер ертең олар өздерінің жасаған ойыншықтарын қалалық шыршада, дүкен витринасында немесе мейрамханадан көрсе, олардың жүрегі шаттыққа бөленері анық», – дейді ол.
Креативті әрі экологиялық таза ойыншықтар жаңажылдық корпоративтік сыйлықтарға, кеңселер мен сауда орындарын безендіруге өте қолайлы. Мерекеден кейін ескі ойыншықтар қайта өңделіп, жаңа бұйымдарға айналуы мүмкін, бұл қайта өңдеу циклін қолдайды.
