Қазақстан Ресеймен бірігіп ғарыш бағдарламасын жүзеге асыруға 233 млн доллар жұмсамақшы
Ресей мен Қазақстан бірігіп, Байқоңырда 2025 жылы «Бәйтерек» жаңа ғарыш жобасын жүзеге асырады. Жобаға Қазақстан тарапы 233 млн доллар жұмсамақшы. Бұл туралы Ресейдің Қазақстандағы елшілігінің телеграм арнасында жазылған.
«Бәйтерек» ғарыш бағдарламасы негізінде экологиялық таза «Союз-5» зымыран тасығыштары әзірленеді. Аталмыш зымырандар улы гептил негізінде ұшатын «Протон» зымыран тасығыштарының баламасы ретінде пайдаланылады.
Жобаға Ресей тарапы 916 млн доллар, ал Қазақстан тарапы 233 млн доллар жұмсайды. Ресей өз қаражатына «Союз-5» зымыранын әзірлейді. Ал Қазақстан ұшыру алаңын жаңғыртады. Нәтижесінде кешеннен жылына экологиялық таза 6-8 зымыран ұшырылып отырады деп күтілуде.
Елшіліктің хабарлауынша, «Бәйтерек» бағдарламасы екі ел үшін де тиімді. Өйткені Ресей нарыққа жаңа экологиялық таза «Союзды» шығарып, коммерциялық табысын арттыра алады. Ал Қазақстан ғарыш инфрақұрылымының операторы рөлін атқарады.
