Соңғы аптада қазақстандық кинотеатрларда кассалық табысы ең жоғары фильмдердің тізімі жарияланды.
1. Моана 2 – 718 104 231 теңге
Ticketon билет операторының мәліметінше, ең көп касса жинаған фильмдердің көшін «Моана 2» бастады. Анимациялық фильм 718 104 231 теңге жинап, көрермендер арасында үлкен сұранысқа ие болды. Бұл көрсеткіш фильмнің балалар мен ересектердің көңілінен шыққанын көрсетеді. «Моана 2» фильмі Disney-дің биылғы жылы қазақ тіліне аударылған екінші фильмі.
2. Таптым-ау сені 2 – 579 277 378 теңге
Екінші орынды Дариға Бадықованың фильмі – «Таптым-ау сені 2» иеленді. Фильм 579 277 378 теңге жинап, отандық кинематографтың әлеуетін тағы бір мәрте дәлелдеді. Бұл сиквел қазақстандық көрермендердің сүйікті фильмдерінің бірі ретінде танылып үлгерген. «Таптым-ау сені» фильмінің алғашқы туындысы былтыр голливудтық «Аватар су жолы» фильмін басып озып, кассалық табысы 1,54 млрд теңге болған.
3. Гладиатор 2 – 98 424 695 теңге
Үшінші орында тарихи драма – «Гладиатор 2», оның кассалық табысы осы аптада 98 424 695 теңге болды. Голливудтық фильм өткен аптада 200 млн жинап көш басында тұрғанымен, анимация мен комедия деңгейіне жете алмағанын көріп отырмыз.
Төртінші және бесінші орындарға «Злая» (41 237 170 теңге) және «Миссия Красный» (21 773 960 теңге) жайғасты. Бұл фильмдер алдыңғы аптада көрермендер тарапынан жақсы қызығушылық тудырғанымен, осы аптада кассалық табыстары төмендеді.
