Франция президенті Эммануэль Макрон елдегі саяси дағдарысқа қарамастан, 2027 жылға дейін билікте қалатынын мәлімдеді. Бұл туралы The Guardian хабарлады.
Франция басшысы отставкаға кету мүмкіндігін жоққа шығарып, жақын күндері жаңа премьер-министрді тағайындайтынын уәде етті.
«Сіздер маған бес жылға демократиялық мандат бердіңіздер, мен оны толық орындауға міндеттімін», – деді Макрон француз халқына жолдаған үндеуінде.
Еске салсақ, Францияның Ұлттық ассамблеясы премьер-министр Мишель Барнье үкіметіне сенімсіздік білдіріп, оны отставкаға жіберу туралы шешім қабылдады. Макрон осы жағдайларға қарамастан, ел басқару жауапкершілігін соңына дейін атқаратынын айқын жеткізді.
