Долларды сататын уақыт келді, Google кванттық есептеуге арналған чипті таныстырды
Google кванттық есептеулерге арналған жаңа чип ұсынды. Ол коммерциялық кванттық компьютерлерді құруда революция жасау мүмкіндігіне ие. Pimco АҚШ мемлекеттік облигацияларын ұзақ мерзімді сатып алу көлемін қысқарта бастады. Бұл Вашингтонда айтарлықтай «шығын» барын білдіреді. Morgan Stanley долларды ауыстырып, басқа валюталарға назар аударуға кеңес береді. 9 желтоқсанға арналған әлемдік БАҚ шолуына зер салыңыз.
Morgan Stanley: америкалық долларды сататын уақыт келді
Инвесторлардың басым көпшілігі АҚШ долларының болашағына оптимистік көзқараспен қарайды. Алайда Morgan Stanley сарапшысы Дэвид Адамс долларды сататын уақыт жеткенін айтты деп жазды Market Watch.
Инвесторлар қазір АҚШ долларынан гөрі британдық фунт пен аустралиялық долларды сатып ала алады. Бұл валюталар сауда шиеленісіне аса ұшырамайды әрі қазіргі кезде тарихи минимумдарға жақын тұр.
«Инвесторлардың жалпы көңіл-күйі доллар үшін өте қолайлы. Бұл саудаға асимметриялық қауіптер тудырады», — дейді Адамс.
Еске сала кетейік, АҚШ долларының «бұқалық» көңіл-күйі америкалық экономиканың жақсаруына және Дональд Трамптың импорттық тарифтерге қатысты қатал саясатының доллар құнын көтеруімен байланысты болып отыр.
Google кванттық есептеуге арналған чипті таныстырды
Google компаниясы «Уиллоу» атты жаңа кванттық чипті таныстырды деп хабарлады BBC. Оның көмегімен қазіргі суперкомпьютерлер септиллион жылдап шешетін тапсырманы 5 минут ішінде шешуге болады.
АҚШ-та кванттық есептеулер жаңа дәрі-дәрмектерді жасау сияқты күрделі процестерді айтарлықтай жеделдетуге мүмкіндік береді. Сонымен қатар бұл тәсіл термоядролық реакторларды жобалауда, сапалы автомобиль аккумуляторларын жасауда және басқа да маңызды мәселелерді шешуде қолданылуы мүмкін. Оларды шифрланған құпия деректерді бұзу үшін де пайдалануға болады.
Алайда мұндай «коммерциялық өнім» 2030 жылға дейін шығарылмайды, ал сарапшылардың пікірінше, қазіргі уақытта «Уиллоу» тек эксперименттік құрылғы ретінде қолданылмақ.
Қазіргі кезде кванттық есептеулердің басты кедергісі — қателіктер. Олардың саны чиптегі кубиттер саны өскен сайын артады. Google мамандары жаңа чипті жобалап, бағдарламалап, қателіктер жиілігін кубиттер саны артқан сайын азайтуға қол жеткізгендерін айтты. Бұл мәселені шешуге олар 30 жыл уақыт жұмсаған.
Pimco АҚШ қазынашылық облигацияларын сатып алуды қысқартты
Әлемдегі ең ірі облигациялар қоры Pimco АҚШ қазынашылық облигацияларын ұзақ мерзімді сатып алуды қысқартуда, деп хабарлады Bloomberg. Бұл шешімнің себебі – Вашингтонның «шығындары». Қор басшылары Марк Зайднер мен Прамол Дхаван ұзақ мерзімді облигациялардан қысқа мерзімді және орташа мерзімді облигацияларға ауысуды ұсынды.
Зайднер мен Дхаванның пікірінше, 2025 жылы АҚШ қазынашылық облигацияларының кірістілігі «ойдағыдай болады». Бұл «дефициттің нашарлау динамикасынан» туындайды. Өз кезегінде бұл ұзақ мерзімді облигациялар кірістілігінің өсуіне алып келеді. Егер инвесторлар ұзақ мерзімді инвестициялардан бас тартса, бұл жағдай күтпеген бағытта өріс алуы да мүмкін.
Bloomberg US Aggregate индексінің кірістілігінің өсуі басқа облигация инвесторларының да «сақтық» ұстанымын көрсетеді деп санайды. Мысалы, BlackRock АҚШ шығындарының артуына алаңдап, қазынашылық облигацияларының ұзақ мерзімді кірістілігінің жоғарылауын күтіп отыр.
Қазіргі уақытта АҚШ-тың емес, Ұлыбритания мен Аустралияның облигациялары ең сенімді болып саналады. Себебі аталған елдердің қаржы жағдайы тұрақты әрі қарыз алу көлемі аз.
Citigroup: желтоқсанда ФРЖ мөлшерлемені 25 базистік тармаққа төмендетеді
Citigroup желтоқсан айындағы ФРЖ отырысы бойынша мөлшерлеменің өзгеруін қайта қарады деп хабарлады Reuters. Citi сарапшылары бұрын 50 базистік тармаққа төмендеуді күтсе, енді 25 базистік тармаққа қысқарту туралы болжамын ұсынды.
Citigroup болжамының өзгеруі өткен жұмада жарияланған деректерге негізделген. Қараша айында АҚШ-тың ауыл шаруашылығынан тыс секторында жұмыс орындарының саны 227 мыңға өсті, бұл сарапшылар күткен 200 мыңнан көп. Аталған көрсеткіш АҚШ жұмыссыздығының 4,2%-ға дейін өсуімен байланысты. Бұл АҚШ еңбек нарығының әлсірегенін білдіреді.
«Деректер тым жұмсақ болған жоқ, сондықтан ФРС мөлшерлемені 50 базистік тармаққа төмендетпейді, бірақ 25 базистік тармаққа төмендету өте ықтимал дүние», – деп жазды Citi сарапшылары.
Еске сала кетейік, Morgan Stanley мен Goldman Sachs өткен аптада 25 базистік тармаққа төмендеу болжамын растады.
