Құқық қорғаушы Айтбек Амангелді Талғарда қаза тапқан жасөспірім Шерзат Болаттың ағасы Нұрғанат Ғайыпбаевтың өлімін тергеу аясында қандай шаралар қабылданып, сараптама жүргізілетінін айтып берді.
Айтбек Амангелдінің айтуынша, Шерзат Болаттың отбасының адвокаттары және туыстарымен бірге Талғарға барып, Нұрғанаттың денесін алған. Оның үйіне барып, туыстарымен тілдесіп, кейіннен Алматы облысының прокуроры Берік Адамовпен кездескен.
«Қазіргі уақытта Қылмыстық кодекстің 105-бабы бойынша қозғалды (Өзін-өзі өлтіруге дейін жеткізу). Нұрғанатқа әлеуметтік желіде көп кері пікір жазылды. Жеке адамдар да, көрермендер де, (Шерзаттың өліміне) күдіктілердің аналары да Нұрғанатты бәріне кінәлі деп мәлімдеді, оны маскүнем деп атады. Бұл мәселе бойынша жала жабу туралы өтініш бөлек жазылды. Мәлімдеме осы сәрсенбіде сотта қаралуы керек еді. Осы жағдайда оған қарсы пікір білдіріп, шабуылдаған азаматтар оны осы жағдайға жеткізді деп болжаймыз», – деді Айтбек Амангелді justice_for_sherzat парақшасында жарияланған видеода.
Сондай-ақ оқиғаның қалай болғаны туралы ақпарат беріп өтті. Оның айтуынша, Нұрғанат үйінде көңілсіз күйде отырып, далаға шығып кеткен. Біраз уақыт өткеннен кейін туыстарына мессенджерде хабарлама жаза бастаған. Кейіннен оның жарықдиодты кабельге асылып қалғаны белгілі болған. Алдын ала жасалған болжам бойынша «өз-өзіне қол жұмсады» деген қорытынды келтірілген. Алайда прокурорлар істі мұқият тергеу үшін бірнеше экспертиза тағайындаған.
«Қылмыстық қудалау органдары кабельдің шыққан жерін анықтап, кабельге молекулярлық-генетикалық экспертиза тағайындалды. Автомобильді қарау кезінде алынған саусақ іздеріне сараптама жүргізіледі. Көліктен табылған екі ұялы телефон тексеріліп, компьютерлік-техникалық сараптама тағайындалады. Нұрғанат пен Қаржаубайдың хат-хабарларына филологиялық сараптама тағайындау – оның бұл хабарламаларды жеке өзі жазғанын тексеру қажет», – деді құқық қорғаушы.
Бұған қоса, 6 желтоқсаннан бастап оқиға болған сәтке дейін бейнебақылау камералары мен телефон мұнараларынан деректерді алып, Нұрғанаттың автокөлігінің бағытын анықтау жоспарланған. Оның телефонына тексеру кезінде қоңыраулар да қаралмақ.
Естеріңізге сала кетейік, 16 жасар Шерзат Болаттың отбасына тиесілі дүкеннің жанындағы төбелес кезінде жасөспірім қаза тапқан. Қазір прокуратура 11 адамды күдікті деп танып, 4 қылмыстық іс қозғаған.
Қайғылы оқиға кезінде Шерзаттың жанында болып жараланған әкесінің інісі 30 жастағы Нұрғанат Ғайыпбаев 9 желтоқсанда қайтыс болған.
