Таиландта бокстан Азия чемпионаты аяқталды. Жалпы 13 қазақстандық боксшының тоғызы финалға дейін барды. Бас бапкер екі салмақ бойынша сайыс қорытындысымен келіспейтінін мәлімдеді.
— Біз тек екі салмақтағы нәтижемен келіспейміз: 48 және 71 келі бойынша. Басқа боксшыларымыз жеңілген финалдарға дауымыз жоқ. Кемшіліктерімізді көрдім. Жақын арада біз оларды жою жұмыстарын жүргіземіз. Ендігі жаттығу физикалық дайындық пен техниканы жетілдіруге бағытталатын болады. Бәрі ойдағыдай болады деп ойлаймын. Жігіттердің әлеуеті де, мүмкіндігі де зор, – деді Қайрат Сәтжанов.
Бас бапкер Нұрбек Оралбай секілді басқа да мықты боксшылар шаршы алаңға шықпағанын қаперге салды.
– Бізде де мықты резерв бар. Ұлттық құрамаға жастарды тартамыз. Жақында бізде Қазақстан чемпионаты болады. Бірақ чемпионат жүлдегерлері ол жерде өнер көрсетпейді, өйткені дайындыққа мүлдем уақыт жоқ, – деді ол.
Чиангмаеда Айбек Оралбай, Бекзат Нұрдәулетов, Сағындық Тоғамбаев, Махмұд Сабырхан алтын ұтып алды.
